Футбол дене Москва областьысе «Долгопрудный» командыште модшо землякна А.Филимонов кугу спорт гыч кайымыж нерген увертарен. Чеверласыме матч май мучаште «Запад» зонын иктешлымаш турнирыштыже лийын.
«Долгопрудный» сборный Великие Луки гыч «Луки-Энергия» команде дене вашлийын, шке тӱшкаж гыч сеҥен лекшаш верч таҥасен. Сеҥымаш моткоч кӱлеш лийын. Эн ончыч Филимоновым ужатыме шот дене. Ончышо-влакланат эн тӱҥжє 44 ияш капка орол, жапше годым Москосо «Спартакыште» модшо да Российын сборныйжын участникше А.Филимоновын кугу спорт гыч кайымыже шотлалтын. «Содыки Филимонов – легенде. Тудо шукыштлан пример да авторитет семын лийын. Тудым йєратат да пагалат. Ончыкшым сай тренер лийын кертеш», – маныныт болельщик-шамыч шке коклаштышт. «Спартак» командын, пляжный футболын ончычсо тале модшыжо-влакат миеныт. Такшым футболист-шамыч ончышо-влакын кумылыштым волтен огытыл: 4:1 счёт дене ончыко лектыныт. Старт шӱшкалтыш деч икмыняр минут ончыч А.Филимоновлан Долгопрудный администраций деч тауштымо серышым кучыктеныт. «Долгопрудный» командышке Александр 2011 ийыште толын, любительский лигыште выступатлен.
Финал шӱшкалтыш деч вара ончышо-влак пасум конфетти дене «сєрастареныт», капка орол деке куржыныт. Орол-шамычат чылаштым чарен кертын огытыл. Мучашлан спортсмен-землякна кумылан-влаклан кидпалыжым шынден да шукышт дене шарнымашеш войзалтын.
А.Филимоновын сеҥымашыже
А.Филимоновын кугу спортыш корныжо СССР жапыште, 1991 ийыште, тӱҥалын. Тунам Йошкар-Оласе «Дружба» командын чапшым арален. Тале вратарьым ойыртемалтше клуб-влак ужыныт, шке командышкышт ӱжаш тӱҥалыныт. Тыге рвезе 1992 ийыште Воронежысе «Факел» команде дене пырля футбол дене Российын чемпионатыштыже участвоватлен, но тургымын иктешлымашыж деч вара «Факел» икымше лигыш логалын. Варажым «Текстильщик» (1994-1995 ийла) сборный дене Еврокубкышто дебютшо лийын. Лач капка орол Филимонов дене Волгоград областьысе футбол клуб историйыште икымше гана УЕФА-н кубокшо верч модын. «Текстильщик» дене контракт пытымеке, Российын чемпионатше деч арня ончыч Александр Москосо «Спартак» командыш логалеш да вара тудын дене пырля куд гана почела чемпион, Россий кубокын озаже лиеш. Тиде команде дене модмыжо Филимоновлан Российын сборныйышкыжо логалаш йєным ыштен. Тунам Марий Эл гыч 24 ияш рвезе Франций дене йолташла вашлиймаште модын, команде 1:0 счёт дене ончыко лектын. А Европын чемпионатше деч ончыч эше ик вашлиймаште Российын сборныйжо француз-влакым 3:2 счёт дене сеҥен. Тыште Филимоновын икмыняр гана командым утарымыжым палемдыман. Лач тиде ойырымо тур рвезын карьерыштыже кугу тергымаш семын лийын.
Российын сборныйыштыжо модмыж годым Александр чылаже 16 матчыште таҥасен, капкашкыже 12 мечым пуртыктен. А футбол карьерыштыже эн кугу турнирлан тӱнямбал чемпионат (2002 ий, Японий, Эрвел Корей) шотлалтеш – тушто тудо ик минутат модын огыл.
Тылеч вара Александр Киевысе «Динамо» командыш куснен. Тушеч мєҥгеш Российыш пєртылмекше, «Торпедо-Металлург» командылан (варажым «Москва» футбол клубыш савыреныт) модаш тӱҥалын. Варажым «Кубань» (Краснодар), «Локомотив» (Ташкент)… Такшым шуко клублаште вийжым терген, чыла вережат тале, опытан голкипер улмыж дене ойыртемалтын. «Долгие пруды» командыште модмыж годым пляж футболлан кумылаҥын. Тыге тудо Москосо «Локомотив» дене кок гана чемпион да Россий кубокын озаже лийын. Тыгак 2011 ийыште элнан сборныйжо дене Евролигыште, континент-влак коклаште кубокышто, тӱнямбал чемпионатыште ончыко лектын.
Россий да йот элласе пляжлаште эртаралтше футбол модмаш деч вара Филимонов тыглай пасушко пєртылын, модшо тренер лийын. Тулысо «Арсенал» командын чапшым арален, ятыр турнирлаште сеҥен, призёр радамыш логалын. Российын высший лигыштыже модмо деч вара «Долгопрудный» профессионал клубыш куснен. Кок тургымышто 26 матчыште модын, а чемпионат мучаште эше кок гана футбол пасушко лектын. Нунын коклаште иктыже – чеверласыме матч.
Такшым Александр футбол гыч нигушкат каяш ок шоно, ончыкшым тренер пашам шукташ тӱҥалеш.
Е.Эшкинина.
А.Филимонов Марий Эл Респубиклан веле огыл, пӱтынь Россий футболлан ойыртемалтше спортсмен семын кодеш. 2013 ийыште курымын модшыжо семын палемдалтын.
