ТАЗАЛЫК

Медицине: Жапыштыже тергалтат – тазарак лият

21 майыште Меланомым тӱҥалтыш йыжыҥыште диагностироватлыме кече палемдалтын. Тудын кышкарыштыже Республикысе коваште-венерологий диспансер кумылан чыла еҥлан консультацийым эртарен. 

Акций дене 310 еҥ пайдаланен. Тидыже ӱмашсе деч изиш шагалрак, но амалжым умылтарашат лиеш: диспансерын специалистше-шамыч 2018 ийым Коваште ракым тӱҥалтыш йыжыҥыште диагностироватлыме идалык семын увертареныт да вич тылзе жапыште республикнан ятыр районыштыжо, рӱдоланан шуко паша коллективыштыже лийыныт, кумылан чыла еҥым дерматоскопий йӧн дене тергеныт.

Ушештарена, коваште рак республикыштына пытартыш ийлаште моло онкологий чер коклаште ончыл верым айла. Тидыже поснак дерматолог ден онколог-шамычым чот тургыжландара, молан манаш гын пытартыш йыжыҥыш шушо меланомым эмлаш огеш лий гаяк, а вияҥаш тӱҥалше меланомым, базалиомым, коваштын вияш клеткан ракшым 95 процент случайыште эмлаш йӧнат, ӱшанат улыт.

Меланомым тӱҥалтыш йыжыҥыште диагностироватлыме кечын тергалтше чыла еҥ кокла гыч кум пациентын меланомо да иктын базалиомо дене черланымыштым рашемдыме. Нунылан келгынрак шымлалташ темлыме.

М.ИВАНОВА.

Опубликовать в Одноклассники

Добавить комментарий