Федеральный льготник-влак соцпакетым але тудын олмеш окса компенсацийым налме шотышто вашмутыштым 1 октябрь йотке пуышаш улыт.
– Окса компенсацийым ойырен налме годым льготник-шамыч тазалыкын кеч-могай жапыште начарем кертмыжым шотыш налшаш улыт, – манеш Марий Элын тазалыкым аралыме министржын алмаштышыже Татьяна Королева. – Черым кужу жап эмлаш кӱлеш гын, 863, 75 теҥге кугыт окса компенсацийын суммыжо эмым налме роскотым нигузеат петырен огеш керт.
Кӱлешан эмым федеральный бюджетын средстваже кӱшеш ситарыме программым илышыш 2005 ийыште пуртымо. Практике ончыктен: соцпакет деч шӧрлышӧ льготник-влак онкологий, сакыр диабет, бронхиальный астме, ревматоидный артрит гай патологийым эмлаш кӱлшӧ препаратым шке кӱшеш налын огыт керт. Икмыняр лу веле огыл, шӱдӧ тӱжем теҥгеаш эм ешым кугу нелылыкыш пурта.
Федеральный льгото дене пайдаланыше пациент социальный услуго набор деч сайын шоналтыде шӧрлен гын, тиде праважым 2019 ий 1 октябрь марте уэмден кертеш – Россий Пенсий фондын верысе пӧлкашкыже йодмашым гына пуыман. Эмым яра налше-влаклан йодмашым пуаш кӱлешыже уке.
М.ИВАНОВА
