Социальный контракт – шонымашым илышыш пурташ полшышо сай йӧн.
Шке пашам тӱҥалаш куштылгыжак огыл, поснак икымше ошкыл-влаклан окса ок сите гын. Но кугыжаныш полыш шонымашым илышыш пурташ чынжымак полшен кертеш.
Тыгай пример-влак кокла гыч иктыже – Йошкар-Олаште илыше, республикыштына веле огыл, моло регионыштат марий модым вияҥдыше, авторский марий вургем ден сӧрастарышым ямдылыше, марий тӱрым тӱрлаш туныктышо уста кидмастар да этнодизайнер семын палыме Надежда Акиеван историйже. Тудо ӱмаште кеҥеж кыдалне дизайн-студийжын пашажым эшеат вияҥден колташ социальный контрактым ыштен.
– Кызытсе жаплан келшыше марий вургемым ынде лучко ий утлат ямдылем. Ӱмаште социальный контрактлан йодмашым пуышым. Тидлан бизнес-планым ямдылышым, тестированийым эртышым, вияҥдаш шонымо пашам комиссийыште аралышым. Кугыжанышын ойырымо оксаж дене промышленный ургымо оборудованийым, тыгак вӱдыжгӧ да шокшо дене обработатлыме оборудованийым нальым. Вургемым бытовой манме машинке дене ургаш – тиде ик паша, промышленно-професиональный оборудованийын полшымыж дене ышташ – йӧршын вес паша. Кызыт кажне кечын чияш келшыше марий вургемым трикотаж гыч уто нелылык деч посна ямдылен кертам, – социальный контрактын пайдалыкше дене палдара Надежда Константиновна. – Кажне кварталыште доходем шотышто отчётым ыштем да чылалан уло чонем дене темлем: шке пашам почаш але тудым эшеат вияҥдаш шонеда гын, социальный контрактым ышташ ида ӧр. Ӱшаныза, чыла сай лиеш.
Социальный контрактым поснак неле илыш йыжыҥыш логалше-влаклан ышташ пайдале, тудо шке пашам почаш да сай доходыш шуаш икымше ошкыл-влакым ышташ полша. Кызыт бизнесым почаш але вияҥдаш 350 тӱжем теҥге марте кугытан окса полышым налаш лиеш.
2025 ий гыч социальный контракт «Еш» национальный проектын кышкарыштыже илышыш пурталтеш. Тудын дене регионышто илен лекташ лийме эн изи окса кугыт (прожиточный минимум) деч кугу огыл доходан граждан-влак пайдаланен кертыт.
Маргарита ИВАНОВА.
Надежда Акиеван ВКонтакте воткыл лаштыкше гыч фото.



