СОЦИАЛ ИЛЫШ

«Уныка» деке «кова» толын…

Звенигово олаште изи йочан еш-влак «Экспресс-кова-шамыч» проектын услугыж дене палынак чӱчкыдын пайдаланаш тӱҥалыныт. Пашаже теве кушто: иктаж сомыл дене миен-толаш кӱлмӧ годым  кажне ача-авак огыл чукайжым лишыл еҥ дене коден кертеш. Тыгай годым нунылан волонтёр-пенсионер-влак полшаш вашкат.

Проектын шонымашыже неле илыш ситуацийыш логалше еш-влакын изи ийготан йочаштым ончаш полшымо дене кылдалтын. Специальный инструктажым эртыше, тазалык шотышто медицине заключенийым налше  кова-влак тыгай икшыве-шамычым кечыште 1-2 шагат ончат. Тиде жапым уремыште, кинотеатрыште, музейыште, концертыште эртарен кертыт, тыгак пӧртыштӧ але пачерыште книгам лудын да каҥашен, йоча фильмым ончен, сӱретлен, иктаж модыш дене модын сеҥат – чылт яра. Ты услуго кӱлешан сомыл дене коштын савырнаш тарваныше ача-ава-влакын илышыштым палынак куштылемда. Проектыш 14 волонтёр-кова ушнен. «Экспресс кова-шамыч» проектын услугыж дене жаплан нелылыкыш логалше шым еш чӱчкыдын пайдалана.

Жап ончыкта: тиде проект ача-ава ден йоча-влаклан веле огыл, «экспресс кова-шамычланат» кӱлешан да пайдале. Илалше ӱдырамаш-влак коклаште сулен налме канышыш лекме деч варат пашам ышташ да пайдале лияш кумылан чолга пенсионер шуко. Тиде социальный проект кова-влаклан шке жапым пайдалын эртараш да изи йочан еш-шамычлан полшаш йӧным ышта, а ача-авалан – шочшо верч утыжым тургыжланыде, кугыжаныш тӧнежлашке, кевытлашке миен толаш, илыме-коммунал услугылан тӱлаш да моло сомылым шукташ.

«Экспресс кова-шамыч» проектым Звенигово районышто Калыкым социально обслуживатлыме рӱдер илышыш 2018 ийыште пуртен.

М.ИВАНОВА

Снимкыште: ава кайымек, «кова» толеш.

Фотом Марий Элын Социальный вияҥмаш министерствын сайтше гыч налме

Опубликовать в Одноклассники

Добавить комментарий