Марий Элым вуйлатыше Юрий Зайцев «2027 ийланда 2028 ден 2029 ийласе плановый жаплан федеральный бюджетын проектшын параметрже-влак нерген» теме дене эртарыме парламент колыштмаште лийын.
Тудым Россий Федерацийын Федераций Советшын председательже Валентина Матвиенко вӱден.
Россий парламентын кӱшыл палатыжын спикержын палемдымыж почеш, бюджет балансироватлыме лиеш, чыла социальный обязательствым шукташ гарантийым пуа.
«Россий президент Владимир Владимирович Путин тӱн паша корным раш ончыктен, тиде – кугыжанышын социальный обязательствыже-влакым шуктымаш, лӱдыкшыдымылыкым ыштымаш, элым обороныжым пеҥгыдемдымаш, специальный военный операцийын участникше-шамычлан да нунын ешыштлан полышым пуымаш. Бюджетын социальный да еш велжым арален кодымылан кугу тӱткыш ойыралтшаш», – палемден Валентина Матвиенко.
Марий Элыште республикысе бюджетын кугу ужашыже шуко шочшан еш-влаклан ешартыш социальный полышым пуаш кая. Республикна специальный военный операцийын участникше-шамычлан да нунын ешыштлан полышым пуымо дене кылдалтше финанс обязательствым турыснек шукта. Марий Элым вуйлатыше Юрий Зайцевын тӱҥалтышыж почеш, регионышто 50 наре социальный мере ышталтын, тиде перечень ий гыч ийыш ешаралтеш.
Чумыр налмаште, Марий Элыште экономике куатым палынак пеҥгыдемдаш, икшырымын вияҥдаш да бюджетын шке парышыжым палынак кугемдаш йӧным ыштыме.
2021-2025 ийыште регионышто ыштен лукмо чумыр кочкыш сату республикыште 7,6 процентлан кугемын. Промышленность 7,3 процентым ешарен, ялозанлык – 16,4 процентым. Тиде лектыш бюджетыште вик палдырнен. Налог да налог огыл парыш 27,7 гыч 46,5 миллиард теҥге марте кушкын. Регион парым политикым сайын эртарен. Кугыжанышын парымже ятырлан иземын.
Республикын экономике могырым вияҥмаштыже Марий Элын социально-экономический вияҥме индивидуальный программыжын рольжо изи огыл. Тудым илышыш пуртымо жапыште 160 инвестиций проектлан полышым пуымо, 1,4 тӱжем утла паша верым ыштыме, бюджетыш бюджетыш
2 миллиард теҥге утла ешартыш налог парыш пурен. 2022-2025 ийлаште социальный могырым кӱлешан 77 объектым уэмден чоҥымо.
Таче республикыште 139 инвестиций проект илышыш шындаралтеш, чумыр налмаште тудын акше – 68 миллиард утла теҥге. 2030 ийлан эше 100 деч шагал огыл проектлан полышым пуаш палемдыме. Социальный да экономике могырым вияҥме индивидуальный программе лишыл кум ийыште экономикылан кажне ийын 1-2 процентлан кушкашыже йӧным ышта.
Марий Элым вуйлатышын пресс-службыжын уверже негызеш Галина Кожевникова ямдылен.
Фотом Россий Федерацийын Федераций Советшын пресс-службыж гыч налме.
