Идалык тӱҥалтыш гыч Еш МФЦ-н услугыж дене 160 тӱжем утла еш пайдаланен, увертарен Российын паша да социальный аралтыш министрже Антон Котяков.
Кызыт Российын 62 регионыштыжо 239 тыгай МФЦ пашам ышта, нунын кокла гыч 49 рӱдерже ял шотан илемлаште верланен. 100 утла тӧнежым регион-влакын тӱҥалтышышт почеш почмо.
Марий Элыште икымше Еш МФЦ 2025 ий декабрьыште Волжскышто пашам ышташ тӱҥалын, 2026 ийыште тыгаяк рӱдерым Йошкар-Олаште почаш палемдыме.
Еш МФЦ-шке неле илыш ситуацийыш логалше чыла еш полышым йодын толын кертеш. Тыште юрист ден психологын консультацийыштым веле огыл пуат, тыгак тӱрлӧ семын полшат, неле илыш пӧрдем гыч лекме корным кычалыт.
Калыклан йӧнан лийже манын, чыла рӱдерыште йоча пӧлем ден цифр сервис кумдыкым келыштарыме.
Ушештарена, Еш МФЦ-м почмо шотышто пилотный проектым «Единая Россия» партийын калык программыжын кышкарыштыже Российын Паша да социальный аралтыш министерствыж ден Йоча-влаклан полшымо фонд 2022 ий гыч илышыш пуртат.
Маргарита ИВАНОВА.
