Кодшо каныш кечылаште Козьмодемьянскыште «Васюки-Фест» койдарчык да мыскара фестиваль эртен.
Тудо шуко калыкым поген. Кум кечаш программыже моткоч поян лийын. Тений организатор-влак пайрем радамыш икмыняр вашталтышым пуртеныт. Таклан огыл фестивальыш Российысе телевиденийын «Первый» каналжын «Непутевые заметки» передачыжын съемочный тӱшкаже толын. Тудо ты мероприятий нерген гына огыл, Курыкмарий, тыгак республикысе моло муниципалитетлаште турист-влаклан келшыше объектла нерген материалым чумыра. Чыла тидыжым вара ик выпускышто ончыкташ тӱҥалыт. Ушештарена, каналын войзышо тӱшкаже Марий Элыш 2024, 2025 ийлаште толын каен.
Фестиваль «Тиде тыланда Рио огыл, Васюки» манме карнавал ошкылмаш дене тӱҥалын. Ик эн ончылно Челябинск гыч «Уездный город» КВН командын участникше-влак лийыныт. Нуно кастене Пазар площадьыште калыкым воштылтеныт.
Карнавалым Чыкма олан чапланыше кок предприятийжылан – «Копир» ден «Потенциал» завод-влаклан почаш да тӱчаш ӱшаненыт. Тений кок предприятийжыланат 60 ий темеш. Коклаштышт эше спортсмен, куштышто да мурышо коллектив-влак да молат каеныт. Ошкылмашке ушнышо-влак пристаньыште Остап Бендерым да тудын свитыжым вашлийыныт. Чыкма олан мэрже Михал Козлов ик кечылан тудлан Козьмодемьянск деч сравочым кучыктен.
Вес у вашталтышлан калык кочкыш фестивальым шотлыман. Тудын кураторжо «Российын гастрономий картше» всероссийский проектын вуйлатышыже Екатерина Шаповалова лийын. Тушко республикыште палыме ресторатор ден организаций-влак ушненыт: «Мари» сийгудо, «Прозорье», «Чебуречек». Шукышт марий кочкышым – коман мелнам, пареҥге мелнам, кравецым да тулеч молым темленыт.
Йӱлаш пурышо шахмат турнир годым иканаште 20 оҥаште модыныт. Йошкар-Ола гыч шахматист-влак Константин Житников ден Федор Емельянов миеныт. Уна-влак 31 партийыште сеҥеныт гын, 2 ничья лийын. Чесбол оҥайын эртен, команде-влак кугу шахмат оҥаште таҥасеныт.
12 пӱкеным ужалыме аукцион эре шуко еҥым пога, вет иктыштыже бриллиант лийын. Мадам Грицацуеван погыжым Остап Бендер шкежак ужален. Тений шергакан кӱжӧ 8-ше №ан пӱкеныште лийын. Тудым 18 тӱжем теҥгелан Курыкмарий округ Виловат села гыч пӧръеҥ налын.
Пайрем пайрем дене, но ты кечылаштак тышке турбизнесын еҥже-влакын пашаче форумышт эртен. Тӱҥ шотышто туризм пашам кузе тӱҥалме, инвестор-влакым кумылаҥдыме, турмаршрутым почмо да тыште кӧлан эҥерташ лийме нерген мутланеныт.
Фестивальыште кажныже шкалан келшышым, кумылым нӧлтышым муын кертын. Эсогыл «Таракан-влакын куржталмашыштым эскераш лийын. Кӧжӧ тӱрлӧ модыш ден конкурсышто, мастер-классыште шкенжым терген, кӧжӧ концертым ончен, а кӧжӧ Юл воктенысе яндар юж дене шӱлен, колым кучен. Кол кучымо дене таҥасымаш команде да посна еҥ-влак коклаштат эртен. Фестивальлан тӱҥалтышым пыштыше журналист да бизнесъеҥ Виталий Шкалин шкежат тений тудын унаже лийын.
Таклан огыл турист-влак палемдат: «Тиде фантастический кече ыле. Тынар мыскара, тынар усталык шӱлыш тыште шижалтын. Организатор-влаклан кугу таум ыштыман. Вес ийынат тышке толаш кумыл лектын».
«Ий гыч ийыш Козьмодемьянск шкенжын куатшым почеш. «Васюки-Фест» тыште илыше калыкым веле огыл, шуко предпринимательым, унам лӱмын толаш кумылаҥда. А тидыже «Единый Россий» партийын калык программыжым илышыш шыҥдарымаште шинчаш перныше ошкыл: ме кундем кӧргысӧ туризмым вияҥдена, верысе тӱҥалтыш-влаклан шукталташ полшена. Да шке шинча денак ужына, кузе чыла тиде ышталтеш – ола ила да тӱзлана!» – палемден Марий Эл Кугыжаныш Погынын депутатше Светлана Громова.
Чынжымак, ты фестиваль ий гыч ийыш пеҥгыдемда: мыскара – кугу вий. Тудо еҥ ден ола-влакым уша, туризмым, тӱвыра кылым вияҥдаш полша.
Светлана Носова
Козьмодемьянск ола администраций деч налме фото.
