М.Шкетан лӱмеш Марий национальный драме театрын артистше-влак икымше гана Владикавказыш миен толыныт.
Театр коллектив «Вахтангов. Путь домой» кумшо фестивальыште «Записки юного врача» спектакльым Йӱдвел Осетийын рӱдолаштыже – Аланийыште – Мариинский театрын филиалжын сценыштыже модын ончыктен.
Фестивальыш тыгак Российысе академический молодежь театр, С.В.Образцов лӱмеш курчак театр да Российыште ик эн тоштылан шотлалтше Ярославль оласе В.Г.Волков лӱмеш драме театр-влак ушненыт.
Фестиваль 6 июльышто карнавал вургемым чийыше-влакын олан рӱдӧ уремлаже дене ошкыл эртыме дене тӱҥалын. Республикыш унала мийыше, усталык коллектив-влак, тусо калыкле-тӱвыра общество-шамычын еҥышт да молат, ойыртемалтше костюмым чиен, эртеныт. Ик эн кугу унаже кумдан чапланыше режиссёр, актёр да педагог Евгений Вахтаноговын шындыме «Принцесса Турандот» йомакше гыч тӱҥ героине лийын.
– Мемнан артист-шамыч 8 июльышто моткоч мотор да кумда сценыште спектакльым ончыктеныт. Залыш погынышо вичшӱдӧ утла еҥ постановкым моткоч шокшын вашлийын. Чыланат пеш тӱткын колыштыныт, шып эскереныт, а мучашлан, рӱж кынелын, совым кужу жап кыреныт. Спектакль деч вара Москвасе Вахтангов лӱмеш театр директор, Россий искусствын сулло деятельже Кирилл Крок ден Йӱдвел Осетийын тӱвыра министржын алмаштышыже Марина Рамонова саламлыме шомакым ойленыт да пашанам кӱкшын акленыт, – палдара театрын художественный вуйлатышыже, спектакльын режиссёржо Роман Алексеев. – А варажым актёр клуб эртен. Тушто ме калыкнан йылмыже, йӱлаже, тӱвыраже дене палдарыме программым ончыктенна, марий мурым муренна, куштенна. Вахтангов театрын артистше-влакат мастарлыкышт дене куандареныт.
Марий артист-влакын палемдымышт почеш, фестиваль жапыште тунемме программе театр сымыктышым йӧратыше-влакым шуко чумырен. Вахтангов пӧртыштӧ тӱрлӧ теме дене лекцийым колышташ, москосо театральный вузла гыч профессор, тыгак кумдан палыме театр критик, журналист-влакын мастер-классыштышт лияш чылалан пеш пайдале ыле. Кажне кастене Моско, Санкт-Петербург да Ростов-на-Дону олала гыч мийыше уремысе театр-влак рӱдӧ паркыште, Тыныслык проспектыште кава йымалне да ретро-трамвайыште тӱрлӧ постановкым ончыктеныт. Ӱмаште фестивальыш чылаже 13 тӱжем еҥ погынен, а тений эшеат шукырак манын палемденыт.
– Экскурсий кужу жаплан шарнаш кодеш. Кугу курыкласе пӱртӱсын каласен мошташ лийдыме моторлыкшо, куатше чоныш волгыдым пуртен. Евгений Вахтанговын тоштер-пӧртыштыжӧ лияш – кугу куан. Туштак ме Евгений Богратионовичын Владикавказыште пашам тӱҥалме пагытше нерген кумданрак пален налме. Москошто тунемме годым Вахтангов театрыште художественный лабораторийыште лийынам, садлан мыланем чылажат оҥай ыле, – ешарыш Роман Юрьевич.
Фестиваль 12 июльышто кугу концерт дене мучашлалтын. Тушто Е.Вахтангов лӱмеш кугыжаныш академический театрын артистше-влак, республикысе мурызо-влак куандареныт. Лӱмын ӱжмӧ уна-влакат: Клава Кока, «Отпетые мошенники» группо да исполнитель Арсен Мукенди – пайрем шӱлышым пуртеныт.
Алевтина БАЙКОВА
Фотом театрын архивше гыч налме
