КУЛЬТУР ДА ИСКУССТВО

«Армий илаш туныктен»

Вашке — Шочмо элым аралыше-влакын кечышт. Тидын вашеш шукынжо салтак илышыштым шарналтат, очыни. Марий мурызо, артист-влак кушто службым эртеныт да тунамсе жап гыч мо эн чот шарнымашеш кодын?

Сергей Байназов, Пошкырт вел мурызо:

— Армий — шкем физически да духовно могырым тергымаш. Школ деч вара, шыжым, вигак армийыш каенам, погран войскаш логалынам. 1990-1992 ийлаште Эстонийыште, Балтий теҥызыште, оролышо корабльыште служитленам. Салтак илышыште чылажат лийын: экипажыште 18-20 еҥ ик ешла иленна: рушыжат, марийжат, украинжат, чеченжат, казакшат, молдаванжат… Тунамсе йолташ-влак кузерак илат, пӱрымашашт могай? Нине йодыш-влак чӱчкыдынак ушыштем пӧрдыт.  Армийым пӧръеҥлан эртыман, илышым вес семын ончаш. Тидым жап эртымеке веле умылет. Кок эргым кушкеш. Коктынат армийыш каяш тореш огытыл.

Игорь Актуганов, Марий Элын калык артистше:

Армийыш 1993 ий ноябрьыште армийыш каенам. Службем Оренбург обласьысе Ясный олаште стратегический кӱлешлыкан ракет войскаште эртен.

Кок тылзе служитлымеке, мый декем ик ӱдырамаш унала толын. Моткоч ӧрынам ыле. А тудыжо мемнан пошкудо Янашбеляк ял гыч улмаш. Мыйын тушто служитлымем нерген тудлан авам ойлен. Тиде ӱдырамаш мыйым мӧҥгыжӧ унала наҥгаен. Службо жапыште начарын пукшат ыле, а саде ӱдырамаш дене мӧҥгысӧ тамле кочкышым кочкаш — салтаклан кугу куан.

Армий гыч 1995 ий 21 майыште пӧртылынам. Толмем нерген такшым нигӧлан ойлен омыл. Пӧртыш пурен шогалмеке, авам чо-отак ӧрын ыле. Но, пуйто шижын, руашым ямдылен. Икмыняр жап гыч авамын тамле когыльыжым шер теммешкемак кочкым.   

А.БАЙКОВА

 

 

Опубликовать в Одноклассники

Добавить комментарий