Кугыжаныш Погынын социальный политике, тазалык аралтыш да ветеран-влакын пашашт шотышто комитетшын председательже Наталья Козлова Еш, йӧратымаш да ӱшанле улмо кечылан пӧлеклалтше торжественный мероприятийыште участвоватлен.
Мероприятий шуко шочшан еш, мер организаций да ветеран-шамычым иквереш чумырен. Вашлиймаш шокшо да пайрем шӱлыш дене эртен. Наталья Козлова погынышо-влакым марий парламентым вуйлатыше Михаил Васютинын лӱмжӧ дене саламлен.
«Российыште 2026 ийым Икоян улмо идалык семын увертарыме. Тиде икойлыкын икымше да эн лишыл школжо – еш. Лачшымак ешыште ме икте-весым умылаш да пагалаш тунемына, а тидын гоч – воктенна, республикыштына да кумда элыштына илыше чыла еҥым», – палемден тудо.
Парламентарий-влак еш институтым пеҥгыдемдыме йодышлан кугу тӱткышым ойырат. Республикыштына пытартыш кок ийыште гына икшыван, шуко шочшан да йочам ончаш налше еш-шамычлан полшымо, тыгак кушкын толшо тукымым воспитатлаш сай йӧным ыштыме шотышто шуко законым пеҥгыдемдыме.
«Регионыштына кажне еш эҥертышым шижше манын, шкенан тӱҥ задачынам кӱлын шуктен толына. Тиде пайрем кечын тыланда эн кӱлешаным гына тыланена: ешда чыла шотыштат ӱшанле эҥертыш лийже, пӧртыштыда икте-весылан эреак полшаш ямде улмо кумыл, ик шонымаш да шӱм-чон шокшо озаланышт. Тек йоча-шамыч йӧратымаш да куан шӱлышеш кушкыт, ача-ава-влак шочшышт дене кугешнат, а кугурак тукым поро тӱткышым шижын ила», – манын депутат.
Наталья Козлова Киселевмыт ешлан «Эн сай паша династий» отличий знакым кучыктен.
Киселевмытын паша корнышт 1949 ийыште еш озан ача-аваже Иван Александрович да Лидия Михайловна Киселевмыт деч тӱҥалын. Династийыште – педагог-шамычын кум тукымышт гыч шым еҥ. Паша стажыштым иктыш ушаш гын, 188 ийыш погына. Киселевмыт шукыжо И.К.Глушков лӱмеш Оршанкысе шуко профилян колледжыште тыршеныт. Эн кугу ийготан Надежда Ивановна тиде тунемме заведенийыште ынде 44 ий утла ышта. Самырык-шамычын наставникышт – пашан ветеранже, Марий Эл образованийын сулло пашаеҥже.
Кызыт И.К.Глушков лӱмеш Оршанкысе шуко профилян колледжыште Киселевмыт династий гыч ныл еҥ пашам ышта, тунемме заведенийым вияҥдымашке кугу надырым пышта.
Маргарита ИВАНОВА.
Марий Эл Кугыжаныш Погынын пресс-службыжын фотожо.
