16-18 июльышто Козьмодемьянскыште «Васюки Фест» койдарчык да мыскара фестиваль эрташ тӱҥалеш.
Тиде кум кечыште пайрем калыкым театр постановко, КВН модыш, карнавал шествий, калык кочкыш фестиваль, концерт, тӱрлӧ спорт таҥасымаш, модыш да конкурс вучат.
16 июльышто фестивальым «Все» усталык ушем «Бабы» спектакль дене почеш. Тушто Юрий Синьковский ден Юлия Охотникова модыт.
17 июльышто А.В.Григорьев лӱмеш Художественно-исторический тоштерыште тӱрлӧ кундемла гыч туроператор-влак регионысо турист маршрут-влак нерген каҥашаш лӱмын погынат. А кастене Я.Эшпай лӱмеш Калык тӱвыра полатыште КВН эрта.
Тӱҥ мероприятий-влак 18 июльышто олан ӱлыл ужашыштыже лийыт. «Уездный город» КВН команде дене пырля Остап Бендерым вашлийме деч вара «Тиде тыланда РИО огыл, Васюки» карнавал шествий тӱҥалеш. Туштак латкок пӱкеным ужалыме аукцион эрта. Чыланат палена, очыни, иктышкыже оганизатор-влак бриллиантым шылтат.
Кечывалым триатлон таҥасымаш стартым налеш, туштак йоча площадке шке пашажым тӱҥалеш, тӱрлӧ мастер-класс-влак эртат.
Тенийысе фестивальын у вашталтышыже – калык кочкыш фестиваль. Куштымаш студий бачатам да сальсам кушташ туныкта. Юл эҥерыште эр гычак колызо-влакын таҥасымашышт тӱҥалеш, а тошто олан уремлаже мучко гандикап- забег эрта. Кечывалым пристаньыште шахмат турнирыш, купеч Сидневын пӧртшӧ воктене силовой экстрим дене таҥасымашыш ушнаш лиеш.
Программыште тыгак мыскара шоу, студент театр-влакын эстраде мниатюрышт улыт.
Кастене тӱҥ сценыште духовой оркестр шокташ тӱҥалеш. Озаҥ гыч вокально-инстурментальный ансамбль да Чыкма оласе моло группо-влак кумылым нӧлтат. Фестивальым дискотеке мучашла.
Светлана Носова
Фотом фестивальын ВКонтакте воткыл лаштыкше гыч налме.
