Марий Элыште Российын почётан доноржо-влакын радамышт кушкеш.
Тиде кечылаште Национальный художественный галерейыште тыгай удостоверенийым эше 15 еҥлан кучыктымо.
Республикысе вӱрым налме станицийын директоржо Екатерина Зангерова донор акцийыш ушнышо да тудым эртарашш полшышо-влаклан таум ойлен.
Ты кечын Марий Элын Тазалык аралтыш министерствыжын Тауштымашыжым Марий Элыште Росгвардий виктемын медицине полышым пуышо группым вуйлатыше, медицине службын майоржо Евгений Зиновьевлан, тыгак Марий кугыжаныш университетыште молодёжь политике шотышто проректор Анастасия Кузнецовалан кучыктеныт.
«Донорство объединяет» спецпроектын участникшын да «СоУчастие» всероссийский конкурсын дипломжо дене Российын почётан доноржо, донор-влакын толкыныштын чолга еҥже Раиса Чепайкина палемдалтын. Тудо вурым 100 утла гана пуэн.
Российын почётан доноржо-влак радамыш ушнышо-влаклан удостоверенийым Марий Элын тазалык аралтыш министржын алмаштышыже Ангелина Ушакова кучыктен.
Ты кечынак Донорын тӱнямбал кечыжлан пӧлеклалтше «Илыш верч икоян лиймаш» усталык конкурсыш ушнышо йоча-влаклан – София Заболотскихлан, Роман Рыбаковлан, Катя Миклеевалан, Даша Семякиналан да Лера Миклеевалан – Республикысе вӱрым налме станций пӧлекым ыштен.
Г.Кожевникова
Фотом Марий Элын Тазалык аралтыш министерствыжын соцкылысе лаштыкше гыч налме
