Марий Эл гыч врач-влак «Признание-2026» национальный премий дене палемдалтыныт.
Тиде республикын Тазалык аралтыш министерствыжын тӱҥ внештатный ангионеврологшо, Йошкар-Оласе клинический эмлымверын неврологий отделенийжым вуйлатыше Елена Шишкина ден Волжск оласе рӱдӧ эмлымверын 1-ше №-ан первичный вӱргорно отделенийжым вуйлатыше, врач-невролог Светлана Патрина.
Тыгай премийым Российыште медициныште кугу сеҥымашыш шушо ик эн виян врач-влаклан пуат. Проектым 2001 ий гыч Россий Федерацийын Тазалык аралтыш министерствыже ден Икымше канал илышыш пуртат.
«Медициныште у направленийым ыштымылан» номинацийыште вӱргорно дене кылдалтше черан-влакым эмлаш у системым шонен лукшо невролог ден реабилитолог-шамыч палемдалтыныт.
2000-ше ийла гыч Российыште кажне ийын 1,5 миллион наре еҥ вӱргорно дене кылдалтше черлан кӧра колен. Регионысо 229 вӱргорно рӱдерым да 479 первичный вӱргорно отделенийым ыштыме дене элыштына инсультлан кӧра ӱмыр лугыч лийше-влакын чотыштым кок пачаш утлалан шагалемден кертме, а инфрактлан кӧра колышо-влакын чотыштым – кум-вич гана. Программым илышыш пуртымо жапыште россиян-влакын ӱмырышт куд ийлан кужемын.
Москваште эртыше торжественный вашлиймашыш вӱргорно системе дене кылдалтше пайдале программылан негызым ыштыше врач-влакым ӱжыныт, нунын коклаште Елена Шишкина ден Светлана Патрина лийыныт.
Г.Кожевникова
Фотом Марий Элын Тазалык аралтыш министерствыжын соцкылысе лаштыкше гыч налме.
ФОТО: Сервер, Кож, ПРИЗНАНИЕ ФОТО или ПРИЗНАНИЕ ФОТО 2
