Марий Эл ден Башкортостанын парламентарийже-влак йылме политик вияҥдыме йодышым каҥашеныт.
Марий Эл Кугыжаныш Погынын депутатше-влак видео-конференций йӧн дене Башкортостан Республикын Курултайжын – Кугыжаныш Погынжын – Науко, образований, тӱвыра, молодёжный политике да спорт комитетшын Бирскыште эртыше заседанийышкыже ушненыт.
Погынышо-влак ончылно Марий Эл Кугыжаныш Погын председательын икымше алмаштышыже, Россий Президент пелен Калык-влак кокласе кыл шотышто советын еҥже Лариса Яковлева выступатлен.
Тудо Пошкырт Республикым вуйлатыше-влаклан, депутат корпусшылан да муниципалитет-влаклан тӱрлӧ калык-влакын йылмышт ден тӱвыраштым арален да вияҥден толмылан тауштен. Регионышто кугыжаныш национальный политикым системно илышыш шыҥдарен толмымат палемден.
– Ме коллегем-влак дене пырля Бирск ден Мишкан районлаште ик гана веле огыл лийынна, сандене тендан полилингвальный школын да Марий историй да тӱвыра рӱдердан могай пашам шуктымышт нерген сайын палена. Республикыштыда кугыжаныш национальный политикым шонен илышыш шыҥдарымыда сай лектышым пуа. Тӱвыра рӱдер-влаклан, полилингвальный образованийлан да калык йӱлам арален толмылан могай тӱткышым ойырымыдамат сайын ужына. Ме ончылнына шогышо задаче-влакым умбакыжат пырля шукташ ямде улына. Кажне калык, кушто илымым ончыде, шкенжым Российын – ик ешын – ужашыже семын шижшаш, – палемден Лариса Николаевна.
Заседанийыш тыгак Марий Эл Кугыжаныш Погынын Тӱвыра, национальный политике, туризм да спорт комитетын председательже, Мер Каҥаш вуйлатыше Эдуард Александров, Науко, образований да молодёжный политике шотышто комитет председатель Григорий Пейсахович да образований ден науко министрын алмаштышыже Валентина Гаврилова ушненыт.
Каҥашыме тӱҥ йодыш «Башкортостан Республикысе калык-влакын йылмышт нерген» законын муниципал кӱкшытыштӧ шукталтмыж нерген лийын. Тидын нерген Мишкан, Калтаса да Бирск районласе админирацийыштын еҥышт палдареныт.
Марий Элыштат йылме политике шотышто регионысо законодательствым илышыш шыҥдарыме паша радам дене шукталтеш. Кугыжаныш Погынышто лӱмын пашаче тӱшка ышталтын. Тудын тӱҥ задачыже – тӱвыра да йылме дене кылдалтше региональный базовый закон-влакым уэмден толмаш. А тидыже федерал кӱкшытыштӧ законодательствын вашталтмыже да «Россий Федерацийысе калык-влакын йылмышт нерген» федерал законын у проектшым ямдылыме дене кылдалтын.
Заседанийым иктешлышыла участник-влак ончыкыжат каҥашыме йодыш дене вашкылым пеҥгыдемдаш кӱлмым палемденыт. Йылме, тӱвыра, тичмаш налмаште кугыжаныш национальный политике дене кылдалтше йодыш-влакым иквереш каҥашен толаш манын, тыгай форматымат кучылтман.
Кугыжаныш Погын гыч налме фото
