СОЦИАЛ ИЛЫШ

Шӱгарлам эрыктет – суапым налат

Семёновка посёлкысо шӱгарла Молодёжный уремыште илыме да моло пӧрт деч тораштыжак огыл верланен. Тиде мемориал комплексым печылен налме. Тушко кызыт нимом тояш огеш лий – чарыме. Marihistori.ru сайтын увертарымыж почеш, шӱгарлаште георгиевский кавалер да 1877-1878 ийласе руш-турок сарын геройжо Филипп Бушуев кия. Кумдан палыме руш поэт Александр Котомкин-Савинскийын ачажымат – Ефим Гордеевичым – тышанак тойымо. Тудын шӱгаржым арален коден кертме.  

Йошкар-Ола мэрийын пресс-службыжын палемдымыж почеш, шукерте огыл Семёновка шӱгарлам йыклык эрыктыме. «Шуко шӱгарым нигӧ ок эрыкте, ок тӱзате, молан манаш гын колышо-влакын родо-тукымышт але вес кундемыш илаш кусненыт, але шкештат илыш гыч каеныт. Шӱгарлаште пушеҥге-влак туге кушкын шарленыт, эсогыл пич чодырам ушештарат. 2015 ийыште тудым студент-волонтёр-шамыч полшымо дене шотыш конденна. Тунам лӱдыкшылан шотлалтше 150 кубометр кошкышо пушеҥгым пӱчкеден луктынна, чыла гаяк шӱгарым, тыгак шӱгарламат тичмашнек эрыктенна»,– манеш Семёновка кундем виктемын вуйлатышыже Пётр Семёнов.

Шӱгарлам ты ганат тыгыде кушкыл, йӧрлшӧ да кошкышо пушеҥге деч эрыктыме, шӱкым поген налме, шудым солымо. Чылаже 48 кубометр йордымӧ пушеҥгым пӱчкеден лукмо.

М.ИВАНОВА.

Опубликовать в Одноклассники

Добавить комментарий