Воронежыште эртаралтше «Турист ола» I всероссийский премийын «Сувенир турист продукцийын олаже» номаницийыштыже Йошкар-Ола икымше верым налын.
Финалыш Российын 38 регионысо 56 ола гыч команде-влак лектыныт. Йошкар-Олан делегацийже тыгай сувенир-влакым аклаш луктын: Марий эпос почеш пин-значокым, «Тот самый Йошкин» мармеладым, Шернур сырым, кумыж да тыгыде шер гыч ыштыме, тыгак марий тӱран арвер-влакым.
Йошкар-Ола мэрын алмаштышыже Дмитрий Юркин презентаций годым рӱдолаштына эртаралтше мастер-класс, республикысе сувенир продукцийын реестрышт, Интурмаркет, MITT, Каныш тӱнямбал ончерлаште участвоватлыме нерген каласкален.
Л.Семенова
Фотом Йошкар-Ола администрацийын сайтше гыч налме
