НОВОСТИ ПАТЫРЛЫК Сеҥымаш СПОРТ ТАЗАЛЫК Чолгалык

Элым, шочмо кундемым йӧратат

4-6 июньышто Волжский районо Купсола кундемыште, мотор пӱртӱс коклаште спорт дене кылдалтше, военно-патриотический шӱлышан мероприятий эртен. Тушко верысе Покровский хуторын казакше ден кадетше-влак, пошкудо кундемла гыч уна-шамычат ушненыт. Полевой выход 3-шо гана лийын.

Тушто боевой туныктымашлан келшыше таҥасымашат куандарен,  занятийлаште тактический темымат ӧрдыжеш коден огытыл.  

Мероприятийыш изирак, куграк ийготан-влакат, еш денат толыныт. Верысе казачествын шке тамгаже, флагше, гербше улыт. Вуйлатышышт – Александр Евгеньевич Глухов. Ямдылалтме годымат, таҥасымаштат икте-весым колыштын ыштат, тыршат. Военно-патриотический воспитаний деч посна самырык тукым спорт дене пенгыде кылым кучаш, илышын тӱрлӧ ситуацийыштыже нелылыкым чытен, сеҥен лекташ тунемеш. Тыгак ты клубын воспитанникше-шамыч ӧрдыж кундемлаште эртаралтше таҥасымаш-лаштат участвоватлат, ойыртемалтыт.

Икана мыят тыгай полевой выходышто уна лийым. Келшен. Тудо  ончычсо «Зарнице» модмашым шарныктыш, но тыгодым йоча-влакын мастарлыкышт ӧрыктарыш. Верысе «Клинок» команде сайын выступатлыш. Тушто тыгак альпинизм, туризм, рукопашный кучедалмаш, тактический ямдылалтмаш, кӱзым кышкыме дене мастарлыкым налыт. Спортын икмыняр видше иктыш ушнен.

«Покровский» казак ден кадет-влак чодыраште шкем кучашат тунемыт. Ориентированийже компас деч посна чодыра гыч лекташ туныкта. Тидыже илышыште моткоч кӱлеш. Мутлан, телефон ок кучо але зарядке пытен, а снегым але поҥгым погышо еҥ йомын, тыгодым кечат пыл шеҥгек шылын… Тыгай годым мом ыштыман?.. Лач тидлан да илышыште вашлиялтше моло чаракым сеҥаш тыште туныктат.

– Йоча-влакым ме духовно пойдараш, ял пашаш шуарен кушташ, туныкташ тыршена. Чылан спорт дене пеҥгыде кылым кучат, писын куржталыт. Шонымашнажак – самырык тукымым военно-патриотически воспиталаш, шочмо мландым, ача-авам йєраташ туныкташ. Шем теҥыз, Азов теҥыз воктенат лийынна. Тидыжым    шинчымашым келгемдыме шотышто чылаштлан сай экскурсий  семын палемдыман. ДОСААФ, военкомат денат мемнан кылна пеҥгыде. Кумылан-влак жапын-жапын парашют дене тӧрштат. Мемнан деке коштшо-шамыч виян, патыр, лӱддымӧ, кеч-могай ситуацийыште илен лекташ йӧным мушо лийыт, – пеҥгыдемден Александр Глухов, Российысе да вес элласе сарзе казак-влакын ушемыштын Марий Элысе региональный отделжын (СКВРиЗ), спорт дене кылдалтше, военно-патриотический шўлышан, «Покровский» хутор ХКО-н казакше ден кадетше-влакын вуйлатышышт, подхорунжий.

Е.ЭШКИНИНА.

Опубликовать в Одноклассники

Добавить комментарий