Кеҥежым Российыште футбол дене тӱнямбал чемпионат лиеш. Вашлиймаш-влак элнан икмыняр олан 12 стадионыштыжо эртат. Таче кечылан чыла арене ямде. Шукышт, чынжымак, чот мотор улыт. Но тушто виян команде-влак огыт мод.
Мутлан, Мордовийыште верысе клуб кокымшо лигыште модеш. Сандене матчлашке 5-7 тӱжем еҥ гына ончаш коштеш. Шукыштым ӧрыктара: молан Сарансклан 30 тӱжем еҥ пурыман стадионжо? Саранск – футбол дене тӱнямбал чемпионат эртышаш ола-влак кокла гыч эн изи (314 тӱжем еҥ) ола.
Ареным 2012 ийлан ямдылышаш улыт улмаш. Но тӱнямбал чемпионатлан палемдымеке, проектым уэш ончен лектын, 2017 ийыш кусареныт. Тӱҥалтыште стадионым «Юбилейный» манаш шоненыт улмаш, но варажым
«Мордовия Арена» манаш тӱҥалыныт. ФИФА-н йодмыж почеш тудо кӱчыкрак да йоҥгалтше лийшаш улмаш.
Саранскысе стадион «Спартакым» ушештара. Сооруженийже прямоугольникым шарныкта. Пасу, трибуно металлоконструкций дене петыралтыныт да панель дене леведме. Ончыч панельже ошо да нарынчалге тӱсан лийшаш улмаш, но пытартыш проект почеш Россий флаг тӱсаным ыштеныт. Пасу ӱмбалне виш – лач «окна» веле. Стадион Инсар эҥерын пурла серешыже чоҥалтын.
Организатор-влак кужу жап тургыжланеныт: нуным олан пешыжак сай огыл улмыжо, транспортлан корнын начарлыкше, унагудо шагаллык ӧрыктареныт.
Ты кундемыште тӱнямбал чемпионат эртаралтме Мордовийыште ешартыш у каныме верым ышташ йӧным пуа. Тыге мероприятийым эртараш эше ик сай вер лиеш.
Спорт арене гыч аэропорт марте – 4,8 километр, а кӱртньыгорно вокзал марте – 2,4 километр наре. Футбол чемпионат деч вара «Мордовия-Арена» верысе футболист-влаклан «шочмо пӧртышт» семын лиеш.
Саранскысе «Мордовия-Арена» 30000 ончышылан келыштаралтын.
16 майыште ты стадионышто кокымшо дивизионышто шотлалтше «Урал-Приволжье» «Мордовия» ден «Сызрань-2005» команде-влак модыт.
«Мородовия-Арена» стадионышто модыт: 19 июнь. Колумбия-Японий;
25 июнь. Иран-Португалий;
28 июнь. Панама-Тунис.
Е.Эшкинина
