СПОРТ

Ялысе спорт: Мастар-влакым шарналтен, ечыгорныш – мунчалтен…

Март тӱҥалтыште Медведево районысо Нурма (Пасияр) кыдалаш школ воктене Марий Элыште ече дене икымше спорт мастер Д.Соколов ден тале тренер, спорт мастер В.Смирновым шарныме лӱмеш йӱлаш пурышо район кӱкшытан таҥасымашке ятыр кумылан еҥ чумырген. 

Канде кава гыч чевер шошо кече шыргыжын ырыктен, лум чинчын-вунчын йылгыжын, эсогыл шинчаланат шыри-вури веле койын. Ечыгорным ончылгоч ямдылыме: «Буран» дене ыштеныт, тасма гай тӧр шуйналтын.

Мемнан мийымеке, ӱдыр-рвезе-влак, ече ӱмбак шогалын пасу велыш чымалтыныт, южыш, ечым кидешышт кучен, стадионыш вашкеныт. Меат фотокорреспондент дене пырля  почешышт тарвнышна.

Эн ончыч палемдыме корным изирак ийготан ӱдыр-рвезе-влак эртышт. Финишыште кажныштлан шере пӧлекым кучыктышт. Варажым, жапым шотыш налын, школышто тунемше-шамыч икте почеш весе тарванышт. Нуным Юбилейный школ гыч опытан тренер, физкультурым туныктышо М.Николаев колтыльо. Ветеран-спортсмен-влакат вийыштым тергышт.

Кажныже сай результатым ончыкташ тыршыш. Тыгодым тыглай каналтыме семын ече дене мунчалташ лекше-влакат улыт ыле.

Финишыш чылан толын шуыч. Ийготым шотыш налын, сеҥыше ден призёр-влаклан шарнымашан пӧлекым кучыктышт, медаль дене палемдышт.  

 

Эн изи спортсмен Максим Дудниклан посна пӧлекым кучыктымо. Опытан-шамыч коклаште З.Кошкинам (76 ий), Г.Ямбулатовам (68 ий), Е.Гороховым (77 ий), О.Куклиным (78 ий) шарнымаш пӧлек дене палемдыме. Тыге ветеран-спортсмен-влак самырык тукымлан примерым ончыктат. А корныштым шуйышо-влак улыт.

Чынжымак, ече спортым илышыш шыҥдарыше, тудым шуйышо-влак таче кечынат сай результатышт дене ойыртемалтыт. Нунын коклаште тиде кундемынак тале ӱдыржым, тренер пашам шуктышо Н.Ракеевам (Смирновам) мокталтыман. Шкежат спорт мастер да ятыр воспитанникшын  сай кӱкшытыш шумаштышт тудын надырже нимучашдыме.

Таче кечылан ты кундемын эн тале ечызыже, Марий Элын сборный командыжын чапшым аралыше Наталья Морозовам палемдыман. ™дыр Арбаныште шочын-кушкын. Тудлан тиде старт кугу таҥасымаш деч ончычсо тренировко семын лийын манаш келшен толеш..  Арня ончыч Наталья Зеленодольскышто 10 километр кужытышто вийжым терген, шке тӱшкаштыже икымше верыш лектын.

– Строительный техникумышто кокымшо курсышто тунемам, – манеш шкеже. – Тиде тургымышто республикын чемпионатыштыже кум гана икымше верым налынам. Эн кугу старт семын Юл кундем федерал округысо  таҥасымашым шотлем. Тушто мый 25-ше лийынам. Коло эн тале спортсмен коклаш логалаш вием изиш ситен огыл. Первенствыште таҥасаш йӧн лиеш ыле, но… Тидым ынде чаманаш гына кодеш. Такшым ончыкшым эшеат сай  кӱкшытыш шуаш шонымаш уло. Тренировкым «Корта» ече базыште эртена. Тренер Зинат Ракеев ден пелашыже Нина Васильевна жапын-жапын Волжскышко сборыш ӱжыт, туштат ямдылалтына.

Теве ече спортым йӧратыше, тудлан кумылан-влак, игечым шотыш налде, тӱрлӧ стартыш лектыт, тыршат. Тек Натальянат чыла шонымашыже шукталтеш, илышыш шыҥдаралтеш. Илен-толын, можыч, эше ик тале спорт мастер лиеш. Вет тидлан кугуракна-влак чыла йӧным ышташ тыршат, чылажымат шке примерышт дене пеҥгыдемдат.

Е.Эшкинина.
М.Скобелевын фотожо.

Опубликовать в Одноклассники

Добавить комментарий