КУЛЬТУР ДА ИСКУССТВО МАРИЙ ТӰНЯ

Марий журналистлан – кӱкшӧ ак

«Марий Эл» газетнан коммерческий йодыш дене редакторжо Юрий Валентинович Исаковлан Россий Президент В.Путинын 2021 ий 6 апрельыште лекше Указше дене келшышын отечественный журналистикым вияҥдыме суапшылан да ятыр ий тӱвыргӧ лектыш дене пашам ыштымыжлан «Россий Федерацийын сулло журналистше» чап лӱмым пуымо!
Юрий Валентинович марий мутын ямжым шижын, шочмо йылмынан яндарлыкшым арален, тудым  мастарын кучылтын воза, кеч-могай темыланат келге шонымашан статья-влакым шочыкта. Марий журналистикыште шукылан пример.

Ме опытан коллегынам, ой-каҥаш дене полшен шогышо тыматле йолташнам ты кугу сеҥымаш дене саламлена да пеҥгыде тазалыкым, кужу ӱмырым да эше шуко-шуко ий пырля пашам ышташ тыланена.

Россий президент В.Путин тыгай кӱкшытан лӱмым учредитлыме нерген указым 2018 ий кеҥежым луктын, а декабрьыштыже икымше журналист-влакым палемденыт. Республикыштына икымше палемдалтшыже – «Волжские вести» ООО директор, «Волжская правда» газетын тӱҥ редакторжо Александр Лукаев.

 Юрий Исаков – Марий Элыштына тыгай кӱкшытан лӱмым налшыже кокымшо. «Марий Эл» газетланна тиде – кугу чап.

С.Пехметова.

Авторын фотожо

Опубликовать в Одноклассники

Добавить комментарий