СПОРТ

Мемнан-влак – тўнямбал кўкшытыштє

Идалык мучаште кажне ийын эн сай спортсменым ойыраш ынде йўлаш пурен манашат келшен толеш. Марий Эл гыч спортын тўрлє видше дене тўрлє кўкшытан та‰асымашлаште, элнан сборныйыштыжо тале спортсмен семын аклалтше ўдыр-рвезе-влак улытак. Таче нунын кокла гыч икмынярышт дене палдарена.

Ечыгорнышто

Эн ончыч Медведево район Шойбулак села гыч ече дене спорт мастер Екатерина Смирновам палемдыман. Екатерина 2020-2021 ийласе ече тургымышто Российын сборный командышкыже логалын, элнан чапшым тўнямбал кўкшытыштє арала.

Тений январьыште тудо тўнямбал кубок верч та‰асымашын дебъютанкыже лийын. Тунам моло-влак коклаште сай результатым ончыктен. Российысе ече федерацийын президентше Елена Вяльбеат, ончыкылан ўшаным пуышо манын, тудым командыште кодаш темлен.

Теве ынде кызыт тўнямбал кубок верч та‰асымаште ече дене элнан ўдырамаш сборный командыж дене Российын чапшым арала. Та‰асымашын икымше этапыштыже Финляндийыште 27 ноябрьыште классик йєн дене спринтыште 53-шо, 28 ноябрьыште 10 километрыште классик йєн денак 45-ше, 29 ноябрьыште эрыкан йєн дене 24-ше лийын.

Декабрьыште рўдє Европын кубокшо верч та‰асымаште лу километр кужытышто марий ўдыр эрыкан йєн дене латкокымшо верыш лектын.  

Екатеринан та‰асымашыште вийым тергымыжым, тренироватлалтмыжым мыят ик гана веле огыл онченам, эскеренам. Неле гынат, тў‰алме пашажым кыртмен ышта, моло деч пе‰гыдылыкше дене ойыртемалтеш. Кочаже  Алексей Михайловичат уныкажын  койыш-шоктышыштыжо лач тидымак палемда.   

– Катюш изинекак пе‰гыде койыш-шоктышан кушкын, шкенжым кеч-куштат арален моштен. Ончыч тудо куштымаш кружокыш коштын. Марла, чынжымак, сайын куштен. Варажым аваж дене пырля ече дене куржталаш тў‰алын. Ече спорт тукым гыч тукымыш куснен толеш. Жапше годым аважат тренер Эмма Михайловна Лобанова (кийыме мландыже пушкыдо лийже) дене ямдылалтын. Уныкамат тудак кугу спортлан кумыла‰ден, – манеш тудо. –  Ик жап Йошкар-Ола воктенысе «Корта» ече базыш шкеак автомашинам дене шупшыктенам. Ужынам, кузе ямдылалтеш, вет кунам айдеме шкан келшыше пашам ойырен налеш, кыртмен тырша – лектыш  куандарыше лиеш. Ме тудлан полшаш тыршенна. Тўнямбал кўкшытан теле Универсиадыште ший призёр лийын. Тыршымашын саскаже – кум ший, команде дене ик шєртньє медаль.

– Элнан сборный командышкыже логалмыж нерген ончылгочак паленна. Мутат уке, куаненна. Шуко жапым єрдыж кундемлаште, сборышто эртара. Шочмо кундемышке, мє‰гыш, идалыклан кок гана толын кая, – ешарыш Екатеринан аваже Людмила Алексеевна.

Теле тургым, та‰асымаш умбакыже шуйна. Е.Смирновалан пиалан ечыгорным, сай результатым тыланена.  

Екатерина Смирнова:

Шойбулак селаште шочын-кушкын (1996 ий, 4 август);

2020 ийыште элнан кубокшо верч та‰асымаште икымше верым се‰ен налын  (Архангельск область, 26 февраль -1 март).

1 март – тўнямбал кубок верч та‰асымаш, эстафете, 4-ше вер;

Икымше тренерже – Э.Лобанова.

Таче кечылан Марий Эл ден Тюмень областьлан очком конда.   

 

Марий ўдыр-рвезе-влак спортын моло видыштыжат сай результатым ончыктат. Нуно Марий Элын, Российын чапшым аралат.

Мутлан, куштылго атлетике дене тўнямбал кўкшытан спорт мастер, тўнямбал чемпионатын кок гана участникше, Российын сборный командыжын чапшым аралыше Людмила Лебедевалан физический культурым да спортым вия‰дымаште кугу надырым пыштымыжлан тений Марий Эл Республик вуйлатыше таум ыштен. Декабрь тў‰алтыште тале спортсмен Сочисе Олимпийский паркыште эртыше марафонышто вийжым терген, кумшо верым се‰ен налын. Людмила 42 километрат 195 метрыште личный рекордым шынден. Ты кужытым тудо 2 шагат 31 муинутат 29 секундышто эртен. 

Байдарке, каноэ дене Европын первенствыштыже, тыгак тўнямбал первенствын ший призёржо Волжск гыч Артём Коровин ончыкшымат тўнямбал кўкшытыштє та‰асаш ўшаным пуа. 

Биатлонышто Провой кундем гыч Надежда Белкинам мондаш огеш лий. Ятыр ий почела биатлон дене Украинын тў‰ командыштыже лийын. Тений январь-февраль тылзылаште тўнямбал чемпионатыште Украинын сборный командыжын чапшым арален. Результатше пеш куандарыше лийын  огылат, тудым «Б» командыш кусареныт. Кызыт биатлон дене Украинын чемпионатыштыже вийжым терга.    

Теле видыш пурышо да калыкын куанен ончымо видшылан фигурный мунчалтымашым шотлыман. Тиде мотор видыште тений сай ошкыл лийын. Марий Эл гыч кок ўдыр Россий кўкшытан турнирыште вийжым терген, сай результатым ончыктен. Агнета Латушкина всероссийский турнирыште кўчык, тыгак произвольный программылаште шке тўшкаштыже, спорт мастерыш кандидат-влак коклаште, икымше верым се‰ен налын. Элнан кубокшо верч та‰асымаште визымше лийын. Дарья Садковат ойыртемалтын.

Республикыште синхрон куштымаш да фигурный мунчалтымаш дене Россий кӱкшытан первенствым эртарымаш йӱлаш пуреныт. Лӱмлӧ спортсмен-влак марий ий ӱмбалне таҥасат, нуным ончен, верысе-влакат тунемыт, призёр радамыш логалыт.

Спорт туризм дене Марий Элын сборный командыжын   Россий кўкшытыштє ойыртемалтмыжым палемдыман. Спорт туризм дене Российын чемпионатыштыже (тудыжо 5-8 ноябрьыште Владимир областьыште эртен) Марий Элын командыже икымше верым налын.

Личный зачётышто республикна гыч спорт мастер Ксения Мубаракшина кумшо верым налын. Ксения ты вид дене Марий Элын чапшым тўрлє кўкшытан та‰асымашлаште арала.

Самырык шахматист Максим Волков, шахмат дене тўнямбал первенствын призёржо, умбакыжат мастарлыкше дене ойыртемалтеш. Тений онлайн йєн дене тўнямбал кўкшытан та‰асымаште та‰асен.

Спортын олимпийский огыл видыштыже, кекусинкай дене Шернур район гыч марий ўдыр, Полина Петухова, тўнямбал кўкшытыштє сай результатым ончыкта. Тений тудлан тўнямбал классан спорт мастер нормативым шуктымыжлан удостоверенийым кучыктеныт. Тренерже С.Шабердинын палемдымыж почеш, Полина тиде нормативым нылымше гана пе‰гыдемден. Икымше гана 2017 ийыште тўнямбал кубок верч та‰асымаште шуктен.

Кикбоксинг дене тўнямбал кубокын озаже, тўнямбал первенствын кок гана се‰ышыже да тўнямбал кўкшытан Бриллиантовый кубокын озаже Полина Петухова кызыт Чуваш Республикыште ила, ты республикын чапшым арала.

Шкенжым тудо профессионал боксыштат терген.

– Турнирлаште се‰ынем гын, универсальный лийшаш улам. Кеч кикбоксингыште, кеч тайский боксышто, кеч тыглай боксышто сай бойым ончыктышаш улам, – палемда тудо.

Тений Полина ММА дене Европын чемпионатышкыже ойыралтын. Тудыжо 2021 ий 21-26 июньышто Прагыште лиеш.

Чаманен каласаш кодеш: спортын команде дене та‰асыме видше-влакым ойырен палемдаш, мокташ амал уке.

Е.ЭШКИНИНА

Опубликовать в Одноклассники

Добавить комментарий