Ялозанлыкыште 30 деч шагал огыл ий пашам ыштыше ялысе пенсионер-шамычын пенсийыштым тений 1 январь гыч 25 процентлан кугемдыме. Тидым Россий Пенсий фондын верысе органлаштыже тӱлымӧ дела материал почеш пенсионерын йодмашыж деч поснак ыштыме.
Тыге, пашам ыштыдыме «ялысе» пенсионерын пенсийже тылзыште 1,3 тӱжем теҥгелан кугемын, пенсийым III группо инвалидность шотышто налшын – 667 теҥгелан.
Марий Элыште ялысе ешартышым 9921 пенсионер налеш. Тидлан правам пуышо стажым шотлен лукмо годым колхозышто, совхозышто, моло ялозанлык предприятийыште да организацийыште вольыкым, кушкылым да колым ончен куштышо агрономын, трактористын, ветеринарын, мӱкшызын – чылаже 500 утла профессий дене тыршыше еҥын пашам ыштыме жапышт налалтеш.
Тений 25 июньышто ялозанлык пашаеҥ-влакын радамыштым кумдаҥдыме, тушко ынде диспетчерым, лаборантым, врач-эпизоотологым, ялозанлык сатум ыштен ужалыше амалкалчым да мойн пуртымо.
1992 ий йотке российысе колхозлаште, машина-трактор станцийлаште, колхоз-шамыч кокласе предприятийлаште, кресаньык озанлыклаште ыштыме чыла паша ялысе стажыш пура.
Ушештарена, пенсионер ялысе стажлан праваже уло манын шона, но пенсийжым йодмаш деч посна шотлен луктын огытыл гын, Пенсий фондын верысе органышкыже ялозанлыкыште пашам ыштымыжым пеҥгыдемдыше документ дене идалык мучаш марте толын кертеш. Тыгодым тудын пенсийжым 2019 ий 1 январь гычак угыч шотлен луктыт.
М.ИВАНОВА
