Футбол дене III дивизионышто модшо Йошкар-Оласе «Дружба» команде кажне вашлиймашым модын колтен.
1 июньышто йошкаролинец-влак «СШОР Волга-М» (Ульяновск) команде дене таҥасеныыт. Кок командыжат лигын аутсайдерже лийыныт. Ульяновск гыч спортсмен-шамыч турнир таблицыштыже 13-шо верым налыныт гын, «Дружба» – пытартыш 15-шым. Сандене модмаш ничья дене иктешлалтын кертеш манын ӱшан лийын, но адакат сеалтыныт. Ты гана жаплан командыш толшо 39 ияш капка орол В.Малковат (Ереванысе «Улисса» командыште модшо, Арменийын чемпионжо, бронзо призёржо) полшен кертын огыл. «Дружба» уна-влаклан 0:2 счёт дене модын колтен.
Теве Марий Элын чемпионатыштыже футбол тургым моткоч шокшын эрта. Кокымшо тур деч вара команде-влак коклаште тыгай результат: «Знамя» – 6 очко, «Волжск» – 6 очко, «РМТ» – 3 очко, «Тарханово» – 3 очко, «ЗПП» – 3 очко, «Восход» – 1 очко, «УОР-СШОР» – 1 очко, «Сокол» – 0, «Звезда» – 0.
Куандара: футбол дене УОР-ын воспитанникше-влак «Локобол-2019-РЖД» турнирыште сеҥышыш лектыныт. Тыге нуно Марий Элын чапшым регион-влак кокласе «Локобол» турнирын черетан этапыштыже аралат. Тудыжо 10-12 июньышто Йошкар-Олаште эрта.
Ты гана турнирын эн сай бомбардиже семын Даниил Ройзисым, эн сай капка орол Роман Плоцым (коктынат УОР гыч улыт), эн сай защитник семын Кирилл Зариповым («Волжск») палемденыт.
Е.Эшкинина.
