УВЕР ЙОГЫН

Ончыл верыште экономике ден финанс йодыш


12 апрельыште Марий Эл Республикым вуйлатышын пашажым жаплан шуктышо Александр Евстифеев правительствын заседанийжым эртарен. Тушто республикын экономикыж ден финансшылан икшырымын вияҥашышт йӧным ыштыме йодышым каҥашеныт.

Александр Евстифеев кундемыштына финанс ситуацийлан акым пуэн да тудым   банкрот деч ончычсо семын палемден.

«1 январьлан республикын парымже 13 миллиардат 513 миллион теҥгешке шуын. Тиде пеш кугу суммо. Таче технический прогресс да Космонавтике кече, но мемнан вашлиймашын темыж деке пӧртылаш гын, космический мемнан парымна веле. Парым кугем толеш. Кодшо ийын гына тудо  382 миллион теҥгелан кушкын», — манын Александр Евстифеев.

Кугыжаныш ончылно парым кушеч погынымым аклышыжла тудо бюджет сферыште тыршыше посна категорий еҥ-влаклан пашадарым тӱлаш 776 миллион теҥге, калыклан социальный тӱлышлан  223 милилон теҥге, подрядный организаций-влакын налме кредитыштым петырыме обязательствым шукташ 267 миллион теҥге, суд акт-влакым шукташ 394 миллион теҥге кӱлмӧ нерген ойлен.

«Тыгай исполнительный производство чот, ведомство-влакын пашам путырак удан ыштымышт дене умылтаралтеш. 500 утла исполнительный производство. Арбитражный судын пижедылмыжлан кӧра огыл судым модын колтымо, а  правительстве могырым обязательствым пудыртымо шинчаончылнак улмылан», — манын Александр Евстифеев. Кредитор-влак ончылно республикын чумыр парымже таче кечылан 6 миллиард 711 миллион теҥгешке погына

« Мо уло, тудо — уло. Тиде эмоций огыл, а уло мо нерген мутланаш да тудын синонимже нимогай йӧн уке манме лийшаш огыл. Мутланымашын синонимже конкретный ой лийшаш, пашам ышташ кумылаҥме да йӧным кычалме», -манын  Марий Эл Республикым вуйлатышын пашажым жаплан шуктышо.

Заседанийыште Республикын экономический вияҥмаш да торговльо министрже  Фарид Ханафеев ден жаплан финанс министрын пашажым шуктышо Алексей Торощин докладым ыштеныт. Жаплан Марий Эл Республикым вуйлатышын пашажым шуктышо нунын деч  бюджетын парышыже иземме амалым, роскот обязательстве кушмым, парым нелыт ешаралтмым, республикын экономикыжым лушкыдемдыше моло уда процессым умылтараш йодын.

Заседанийыште  «Марий Эл Республикын экономикыж ден финансшым икшырымын вияҥдымашке виктаралтше варалан кодаш лийдыме мерым ыштыме нерген» Марий Эл Республикын  правительствыжын пунчалжым лукмо. Тушто кугыжаныш кучем орган-влаклан экономикыште ситуацийым шотыш кондаш да республикын бюджетшын парышыжым кугемдымашке виктаралтше пашам вияҥден колташ кӱштымӧ.

«Ме вуйнам ошмашке шылтышаш огыл, а пашам ыштышаш улына. Мыйын позицием — пеҥгыдын  йодшо, вет мыланна лектыш кӱлеш», – мучашлен погынымашым Александр Евстифеев.

Жаплан Марий Эл Республикым вуйлатышын пашажым шуктышо заседанийыште лийше-влакым ончыкыжым регионысо экономикым вияҥдымашке виктаралтше мерым ыштыме, решенийым лукмо деч ончыч могай идеологиян улмышт да теорий сынан ончалтышышт деч утларак торлаш, прагматик лияш ӱжын.

Е.Садовин.

(Фотом Марий Эл Правительствын мер кыл да увер управленийже гыч налме.)

Опубликовать в Одноклассники