СОЦИАЛ ИЛЫШ

Ӱшан – волонтер-влаклан

Ӱшан – волонтер-влаклан

Республикым вуйлатыше Александр Евстифеев Марий Элыште айдемын праваж шотышто уполномоченный Лариса Яковлева дене вашлийын мутланен. Тидын годым омбудсменын кодшо ийысе да  тенийысе паша лектышыжым каҥашеныт.

Лариса Яковлева ямдылыме докладыштыже айдемын праваж шотышто уполномоченный дек 2017 да 2018 ийлаште пурышо йодмаш-влакым  таҥастарен лончылен лектын. Отчетный жапыште 463 серыш пурен, тидыже 2017 ийысе деч  изиш шагалрак. Кодшо ийыште еҥ-влак медицине, образований, пенсийым тӱлымӧ, илыме верым пуымо, тидын шотыштак тулык йоча-влаклан илыме верым ойырымо шотышто социальный правам пудыртымылан вуйым шийыныт.  Тыгай еҥ-влаклан полышым пуаш тыршыме.  Сандене тыгай вуйшиймаш пытартыш жапыште икмыняр шагалемын. Йоча дошкольный учрежденийлаште верым  пуымо шотыштат полшаш йодмаш шагалрак пурен.

Вашлиймаште тыгак  илыме вердыме еҥ-влакын праваштым аралыме, эрык деч посна кодымо верлаште шинчыше-влаклан паша верым ситарыме,  правовой  просвещений йодышлам каҥашыме.

Пытартышлан республикым вуйлатыше Инвалид-влакын III  всероссийский  спартакиадыштлан ямдылалтме темылан кугу тӱткышым ойырен, тиде пашаш волонтер-влакым  кумдан ушымо йодышым рашемдаш омбудсменлан кӱштен.

Ондак мыланна спартакиадыш кок тӱжем  спортсмен ден спортивный  судья  толыт манын  увертареныт ыле. Тачысе кечылан участник-влакын чотышт 3200 еҥыш шуын. Нуно элын 71 субъектше гыч толыт. Тынар спортсмен ден судьям сайын вашлийшашлан ты пашаш лийме семын шукырак волонтерым ушыман. Тидлан теат тӱткышым ойырыза, спартакиаде  июльышто лиеш, палемден  Марий Элым вуйлатыше.

Пытартышлан Александр Евстифеев  регинальный омбудсмен  постышто  чулымын пашам ыштымыжлан Лариса Яковлевалан таум каласен.

Марий Эл Республикым  вуйлатышын организаций да аналитике виктемжын  уверже негызеш П.Шакиров ямдылен 

Опубликовать в Одноклассники

Добавить комментарий