Идалык тӱҥалтыш гыч «Рӱдӧ да Юл кундем Россеть Мариэнергошто» сетьыш технологически ушаш 700 утла йодмаш пурен. Эпидемий ваштареш кучедалмашым умбакыже шуйымылан кӧра ты паша онлайн-режимыште шукталтеш.
Тынар йодмашым шуктымаш 8135 киловольт куатым ешарен кычкаш полша, тушечын 400 утла договоржым илышыш пуртымо. Потребитель-влак коклаште утларакше, 86 процент нарыже, физический лица-влак улыт, молыжо, 14 процентше, — юридический лица-влак. Кокымшо тӱшкаштыже связь учреждений, чоҥышо да корно отрасль организаций, тыгак муниципал образований администраций-влакым ончыкташ лиеш.
Электровийым ситарыме, технологически ушымо да моло услугым пуымо дене кылдалтше йодышым рашемдаш интернет-сервис полшен кертеш. Услугылан йодмашым электрон йӧн дене «ТП.РФ» https://портал-тп.рф/ порталыште личный кабинет гоч пуаш лиеш.
Ю.ИСАКОВ