Россий мучко эртыше Сеҥымаш верч молебеныш Марий Элат ушнен. Эртыше кечылаште Йошкар-Олаште Юмын Аван Казанский юмоҥажлан вуйым саваш да кумалаш йӧн лийын.
Ты юмоҥа эше латшымше курым гычак калыкнан икоян улмыжын символжылан да тушман ваштареш кредалмаште сеҥымашке лекташ полшышо виянлан шотлалтеш. Шке жапыштыже Минин ден Пожарскийын виктарымышт почеш Моском поляк-влак деч утарен кодышо калык ополченият ты святыньым пырля кучен. А кызыт тудым Руш православный черкын регионласе епархий еда кондештарат. Маршрут 60 наре олам авалтышаш. Тыгакше ты юмоҥа Моско Йошкар площадьысе Казанский соборышто аралалтеш.
Святыньым Благовещенский соборышто вашлийыныт. Юмоҥа дене кумалме Сеҥымаш верч молебеным Йошкар-Ола да Марий митрополит Иоанн эртарен. Тушко Марий Эл правительствын, исполнительный кучемжын федерал органже-влакын территориальный виктемжын еҥышт, боевой действийын ветеранышт, СВО участникше-влакын ешышт, ола воктенысе военный гарнизонын военнослужащийже-шамыч да молат ушненыт. Вес кечынжат кажне шагат гыч молебен-влак эртеныт. Кокымшо кечын шым шагат кастене святыньым Киров велке ужатеныт.
С.Носова
Снимкыште: Юмын Аван Казанский юмоҥаже – Йошкар-Олаште
Фотом Йошкар-Ола да Марий епархийын лаштыкше гыч налме
