В.М.Васильев лӱмеш МарНИИЯЛИ у книгам ямдылен луктын. Тудо «Сергей Чавайн. Личность.Творчество. Эпоха» маналтеш. Тиде – шанче паша-влакым чумырыман кокымшо книга.

Сборникым МарНИИЯЛИ-н вӱдышӧ шанче пашаеҥже Надежда Федосеева ямдылен. Тышке сылнымутан марий литературлан негызым пыштыше Сергей Григорьевич Чавайнын шочмыжлан 135 ий теммылан пӧлеклалтше IIВсероссийский шанче-практик конференцийын материалже-влакым пуртымо.

Савыктышыште писательын творческий биографийжым шымлыме паша лектыш, произведенийже-влакын сылнылык ойыртемже нерген возымаш да тыгак шанче пашаште икымше гана кучылталтше шкешотан архив материал-влакым погымо.
Книга марий литератур историйым, марий калыкын тӱвыражым кумданрак палаш шонышо-влаклан пеш сай пӧлек.