Турист йолгорно ок шудаҥ
Йошкар-Олаште эртыше агрофорум нерген газетна возен ыле. Тиде мероприятийыште Россий ялозанлык министерствын изи агробизнесым вияҥдыме управленийжын начальникше Рената Бибарсова, тиде управленийын ялысе туризмым вияҥдыме отделжын начальникше Андрей Тутариков лийыныт.
Рената Хамзаевнан мутшо почеш, 2026 ийыште изи бизнесым да ялысе агротуризмым вияҥдаш 14,5 миллиард теҥге ойыралтын. Тений гыч грант-влакым у направлений почеш пуаш палемдыме. Мутлан, ялысе изи пекарньым почмо проектым илышыш шыҥдараш. Кызыт ужалыше кугу сетьлаште темлыме кинде пешыжак ок ойыртемалт. Ялысе изи пекарньыште, мутлан, марий-влакын шкешотан рецептышт почеш киндым кӱэшташ тӱҥалаш гын, пайдаже калыкланат, верысе озанлык-влакланат лиеш ыле. Тидлан лу миллион теҥге марте грант ойыралтеш, но проектын чумыр акшын витле процентше деч шуко огыл лийшаш. Но грант эн ончычак фермер-влаклан ойыралтеш. Тыгак кооператив ден агроагрегатор-шамычлан, ялысе туризмым вияҥдаш, компетенций рӱдер-влакын пашаштлан полыш пуалтеш.
Россий ялозанлык министерствын ялысе туризмым вияҥдыме отделжын начальникше Андрей Тутариковын мутшо почеш, ялысе туризм паша верым почаш, фермер-влаклан шке сатуштым ужалаш йӧным пуа. Тыгак турист инфраструктурым почмеке, моло отрасльлан вияҥашыже корно почылтеш. Вет нунын услугышт денат турист-влак пайдаланаш тӱҥалыт. Проектым илышыш шыҥдараш лу миллион теҥге марте грант ойыралтеш. Тыгодым чумыр проектын акшын 75 процентшым эртышаш огыл.
Россий Ялозанлык министерствын еҥже-влак мероприятий деч вара Оршанке районысо Марково ялыш каеныт, тысе «Море Лаптевых» аквафермыште лийыныт. Региональный министерстве да агротуристический направлений дене кылдалтше специалист-влак дене пырля колым ончен куштымо цехыште лийыныт, нуным тичмаш цикл, технологий, ойырымо грантым кузе кучылтмо дене палдареныт. Эксперт-влак йодышыштлан раш вашмутым налыныт.
Уна-влак тыгай шонымашым эше ик гана пеҥгыдемденыт: у йӧн ден йӱла, иктыш ушнен, чапле кочкыш сатум ямдылаш йӧным пуат, агропромышленный комплекслан умбакыже вияҥаш корным почыт.
Снимкыште: Россий Ялозанлык министерствын еҥже-влак некраголым куштымо цехын пашаж дене палыме лийыт.
Фотом Ялозанлык да кочкыш сату министерствын воткыл лаштыкше гыч налме.
