Марий Эл гыч тале ечызе Е.Смирнова марафонышто элнан чемпионатыштыже кокымшо верым сеҥен налын.
Таҥасымаш 10 апрельыште Мурманск областьыште лийын. Екатерина тӱшка стартыште 50 километрым 2 шагатат 18 минутышто эртен. Икымше лийше Анастасия Рыгалина деч 8 секундлан вараш кодын. Кумшо верым Коми Республик гыч Ольга Царева налын.
Тыге Тюмень областьлан куржталше землякна тений Российын чемпионатыштыже тӱрлӧ кужытышто ныл гана призёр радамыш логалын. Команде дене кок гана чемпион лийын.
Е.ЭШКИНИНА
