24 гыч 29 июль марте Самара областьыште Мастрюковский аланыште самырык-влаклан «иВолга» Юл кундем федеральный округысо форум эрта.
Марий Эл деч грант конкурсыш 11 проектым пуымо. Регион гыч делегацийыш 66 еҥ пурен, нуно кундемнам округ кӱкшытыштӧ ончыктат, опытышт дене ваш пайлалтыт, социально кӱлешан проект-влакым илышыш шыҥдараш тӱҥалыт.
Форум Российын президентше Владимир Путинын кӱштымашыж почеш эртаралтеш. Тудлан Юл кундем федеральный округышто Россий президентын полномочный представительже Игорь Комаров вуйын шога.
Участник-влак шым профиль дене тунемаш тӱҥалыт: «Науко», «IT ден цифр технологий», «Патриотизм», «Тӱвыра ден сымыктыш», «Утарыше службо», «Промышленный комплекс», «Управлений».
Тений форумыш Российын 88 регионжо гыч 28 тӱжем утла йодмаш пурен. Тидыже моло ийла дене таҥастарымаште эн шуко. Ты гана кок грант конкурс лиеш: Юл кундемысе федеральный округышто Граждан обществын институтшым вияҥдаш полшышо фондын грант конкурсшо (тушто 500 тӱжем теҥгем сеҥен налаш йӧн уло) ден Росмолодёжьын конкурсшо (ик миллион теҥгем налаш лиеш).
Оценили 0 человек
