Кодшо ий мучаште Россий Федерацийын Кугыжаныш Думыжо калыкын материальный положенийжым саемдаш виктаралтше икмыняр законым пеҥгыдемден. Иктыж дене келшышын, пенсионер-влак куд сотык кумдык мланде дене пайдаланымылан налогым тӱлымӧ деч утаралтыныт.
Мутлан, дачникын икмыняр участкыже уло. Закон почеш тудо ойырен налме ик участкыжлан налогым ок тӱлӧ. Мланде оза налог деч утараш кӱлмӧ участкым 1 июль марте огеш ончыкто гын, верысе налог службо кугурак акан «льготан» кумдыкым шке ойырен налеш.
Дачникын мландыже куд сотык деч шуко гын, налог кодшо кумдыклан гына палемдалтеш.
Тиде льгот дене Совет Ушемын да Россий Федерацийын Геройышт, I да II группо инвалид, шочынак инвалид-влак, Кугу Отечечственный сарын да боевой действийын ветеранышт, 2018 ий марте пенсийыш лекше-шамыч пайдаланен кертыт.
М.ИВАНОВА.
