Экономике – таче
Шымлымаш гыч – илышыш
Марий Эл правительстве председательын икымше алмаштышыже Дмитрий Троицкий ден промышленность, экономике вияҥмаш да сатулымаш министр Владимир Халюзин паша дене Марий кугыжаныш университетыш миен коштыныт. Тусо базе негызеш науко ден технике шотышто шукталтше проект ден тӱҥалтышла дене палыме лийыныт.
Тӱҥалтыште уна-влак Печатлыме платым шонен лукмо да ты производствылан специалистым ямдылыме рӱдерыш миеныт. Тушто тыгай платым изи тӱшка дене ыштен лукмо производствым пашаш колтымо нерген каҥашыме. Тыге студент-влакын квалификацийыштым нӧлталаш веле огыл, тыгак у паша верым почаш йӧн лектеш.
Вара Инжиниринг рӱдерыш савырненыт. Тушто Мландым дистанционно зондироватлаш бортовой радиолокаций комплексым ямдылыме пашам шуктат. Инжинирингым да производствыш у технологийым шыҥдарымым у семын ончалмаш республикын экономикыжым вияҥдымаштат сай тӱҥалтышым ышташ полшен кертеш, палемденыт уна-влак.
Мучашлан МарГУ-н инноваций разработкыжым – «Geosar» геопорталым – ончыктеныт. Ты ӧрыктарыше проект пӱртӱс да мланде поянлыкым эскерен да виктарен шогаш полшышаш, а тидыже регионым вияҥдымаште поснак кӱлешан, палемдыме вашлиймаште.
Юрий ИСАКОВ
Минпромторгын сайтше гыч налме фото
