Азам ача онча
Россий Федераций Социальный фондын Марий Элысе пӧлкаже республикыштына илыше 215 ачалан 1,5 ияш марте ийготан йочам ончымо шотышто пособийым тӱла.
1,5 ияш марте ийготан йочам ончымо шотышто отпускыш ава веле огыл, ачат каен да тидлан пособийым налын кертеш. Тидланже пашам пуышылан келшыше йодмашым веле пуыман. Пособийлан ешартыш документ огеш кӱл, молан манаш гын пӧлка кӱлешан увер ден справкым ведомство-влак кокласе кылын кышкарыштыже шке пога. Ача йочам ончымо шотышто отпускыш аван мӱшкыран улмо да азам ыштыме шотышто отпускшо пытыме деч вара каен кертеш. Тыгодым тудын паша верже аралалт кодеш, а отпускышто улмо жап паша стажыш пурталтеш.
«2024 ийыште 1,5 ияш марте ийготан йочам ончымо шотышто пособийым тӱлымӧ радам вашталтын. Ынде ача але ава пашашке тичмаш кечылан лектын да тылзе еда тӱлыман пособийым икшывын 1,5 ияш лиймешкыже налын кертыт», – умылтара РФ Социальный фондын Марий Элысе пӧлкажым виктарыше Владимир Орехов.
Пособийын кугытшо – пытартыш кок ийысе кокла пашадар гыч 40 процент. 2024 ийыште эн шагалже 9227 теҥге палемдалтеш, эн шукыжо – 49123 теҥге. Йыгыр йоча шочмо годым пособий кажне йочалан ойыралтеш.
1,5 ияш марте ийготан йочам ончымо шотышто пособийым пашам ыштыдыме ача-влакат налын кертыт. Тудым палемдыме годым ешын мынярак тӱнен илымыже шотыш налалтеш. Ешын доходшо ик еҥлан шотлымаште 9227 теҥге (регионышто илен лекташ лийме эн изи окса кугыт) деч кугу огыл гын, пособийлан правам пеҥгыдемдат. Тыгодым йодмашым Марий Элысе Социальный фондыш пӧлкан клиент службыштыжо але МФЦ-ште, але Кугыжаныш услуго портал гоч пуыман.
Лекше йодышым 8-800-200-11-70 номеран телефон дене чылт яра рашемдаш лиеш.
М.ИВАНОВА
Марий Элысе Социальный фондын фотожо
