Tutu сервисын экспертше-влак Российын икмыняр регионыштыжо лийыныт да турист семын могай кӱктен лукмо кочкышлан кӧра ты але ту верыш миен толаш лиймым рашемденыт.
Марий Элыште тыгай кочкышлан команмелнам шотленыт. Ме тудым кузе ыштымым чыланат палена гын, ӧрдыж гыч толшыштлан умылтараш логалеш. Но турист-влакым утларакшым мелнам кум кужыт дене ыштыме да кӱктен лукмо ӧрыктара.
А теве Дагестаныш эскперт-влак курага да пӱкш дене ыштыме ботлихский когыльылан, Мордовийыш торык да сакырложашым варыман «Самырык ватын оҥжо» булочкылан, Моско областьыш «коломенский» манме калачылан кӧра миен толаш темлат. Эшежым тиде калаче пеҥгыдемеш гынат, ок пунышко, маныт. Саде калачыже кӧгӧн гай форман, да тудым ожно нужна-шамычлан пуэденыт.
Рязаньыш полан когыльым кочкаш кайыман. Кӧргышкыжӧ полан вареньым да шоколадым пыштат. Архангельск велне глазурьан пряникым, Татарстаныште эчпочмакым, Карелийыште тыгак уржа ложаш гыч кӱэштме пареҥган, тӱрлӧ емыжан почмо когыльым моктат.
С.Носова
Авторын фотожо
