Уста йоча-влак дене пашам ышташ йӧн уло

Марий Эл правительстве председательын икымше алмаштышыже Евгений Кузьминын вуйлатымыж почеш, йоча да самырык-влакын «Икымше-влакын толкынышт» общероссийский мер-кугыжаныш толкын дене вашкылым ыштыме шотышто Координационный советым эртарыме.

Тушто 2023 ийысе паша лектышым да 2024 ийлан планым каҥашеныт. Тыгак Марий Эл гыч делегацийын Икымше-влакын толкыныштын II съездыш мийымыштым иктешленыт да мер организацийын регионысо пӧлкажын тений эртарышаш мероприятийлажым пеҥгыдемденыт.

«Икымше-влакын толкыныштын» Марий Элысе пӧлкаже Йошкар-Олаште верланыше Йоча да самырык-влакын полатыштышт ӱмаште почылтын. Таче кечылан республикыште тудын 281 первичный организацийже уло, нуно чумыр налмаште лу тӱжем утла еҥым авалтеныт.

Евгений Кузьмин палемден: Марий Элыште Икымше-влакын толкыныштлан талантан йоча-влак дене пашам ышташ чыла йӧн уло.

Марий Эл вуйлатышын пресс-службыжын уверже негызеш Г.Кожевникова ямдылен.