У ий салам:Йошкар-Ола

Мыйын тӱҥ бизнес пашам – оласе «Сдобново» фирмын тортшым ужалымаш. Ончыч тудым шкенан республик мучко шупшыктымо, вара Киров область ден Татарстаным авалтыме. А тений гыч Башкортостаныш корным почмо. Санденак тортым ужалымаш палынак ешаралтын. Тудым шупшыкташ тенияк кокымшо автомобильым налынам.

Бизнесемын вес корныжо – Морко районышто кок кевытем уло. Икымшыже Унчышто ынде икмыняр ий пашам ышта. Весыжым тений гына Шеҥшыште почмо. Но тудынат пашаже тылзе гыч тылзыш ушнен толеш.

Тенияк кугурак ӱдыремын йочаже шочын, кандаш тылзым темен. Кова семын мылам йоча дене шинчаш, а ӱдырем-влаклан пашам ышташ логалын. Вет бизнесым виктарен колташ лачак нуно полшат.

Шушаш ийыште Морко районыштак кумшо кевытым почнем. Сатум шупшыкташ эше ик автомобильым налнем. Ӱдыремын ешыжлан посна пачер лийже, шонем. Икманаш, план кугу – шукталтше гына.

Шушаш У ий дене эн ончычак кевытче ден водитель-влакем саламлем. Мый нунылан ӱшанем – огыт ондале. Тыгаяк ӱшанле кодышт. Сату налшым порын вашлийышт, шкеныштым пагалышт. Ешыштышт чыла сай, шкешт таза да пиалан лийышт! Ӱдырем-влакланат тидымак тыланем!

Э.А.ЯКОВЛЕВА,

индивидуальный предприниматель