28 октябрьыште, ӱмыр лугыч лийше мурызо, Яныш Ялкайн лӱмеш премийын лауреатше Артур Ефремовым шарналтен, шочмо кечынже Советский посёлкышто самодеятельный автор ден мурызо-влакын тыгай лӱман фестивальышт эртен.
Конкурс кок тур гыч шоген. Икымшыштыже участник-влакын выступленийыштым войзыман видеом ойырен налыныт, а весыштыже гала-концерт лийын. Тушко 35 ияш марте мурызо ден самодеятельный автор-влак ушнен кертыныт.
Гала-концертым «Чоным почын мурена» проектыш ушнышо артист-влак Володя Матвеев, Эльвира Трифонова, Йорга каче да Артурын кугурак ӱдыржӧ Карина Ефремова торжественно почыныт. Конкурсыш ушнышо-влакым Советский муниципал район вуйлатыше Сергей Халтурин саламлен.
Тыгай мероприятийым илышыш шыҥдараш Артурын йолташыже-влак, «Чоным почын мурена» проектын участникше-шамыч, темленыт да чыла призым концертлаште ыштен налме окса дене налыныт. Конкурсант-влакым кум номинацийыште акленыт. Гармоньым шоктен мурышо-влаклан «Гармонемым налын шокталтем» номинацийыш, Игорь Горинов, Никита Козлов ден Алексей Пуртов эртеныт. Гран-прим Оршанке район гыч Никита Козлов сеҥен налын. Пӧлек шотеш тудлан «Шуйский» гармоньым кучыктеныт.
Александр Леонтьев ден Александр Коновалов гитарым шоктен мурышо-влаклан «Эркын-эркын ӧндалам» номинацийыште ойыртемалтыныт. Икымшыже сеҥышыш лектын да пӧлеклан ямдылыме «Shinobi» электроакустический гитар тудын лийын. «Мый муралтем – тый куштлте» номинацийыште автор-исполнитель-влак Анатолий Мартынов, Татьяна Соловьева, Надежда Ильина, Дмитрий Горинов, Карина Ватютова таҥасеныт. Тыште пиал Кариналан шыргыжалын. Тудлан пӧлек шотеш «ECO VOYAGE ХХI» мобильный акустический системым кучыктеныт.
С.Носова
Снимкыште фестиваль-конкурс годым.
Фотом Советский районысо централизоватлыме клуб системын лаштыкше гыч налме.
