«Волгенче»: уста йоча-влаклан корным почаш!
Марий Элыште талантан йоча да самырык-влакын моштымашыштым вияҥдаш йӧным ыштыше «Волгенче» региональный рӱдер почылтын. Торжественный мероприятийыште республикым вуйлатыше Юрий Зайцев лийын.
Российысе «Сириус» тунемме рӱдерым ушештарыше кумдык лач тудын кӱштымашыже почеш ышталтын. Рӱдерын тӱҥ пашаже – республикыште илыше самырык-влак коклаште талантан-влакым кычалаш да нунын моштымашыштым кызытсе илышын йодмашыже дене келшышын вияҥдаш полшаш. Уста икшыве-шамычлан тыгай площадкын кӱлешлыкше шотышто ӱмаште Россий Федерацийын президентше Владимир Путин ойлен.
Марий Элым вуйлатыше палемден: тиде кумдыкым ямдылыме годым «Талант и успех» образовательный фондын паша опытшым, тыгак республикыштына ик эн кӱлешан направленийлам вияҥдаш кӱлмым шотыш налме. Тудо фондын, вуз да предприятийлам вуйлатыше-влаклан полышым пуымыштлан тауштен.
«Тачысе событий мыланна чынжымак кугу. Тыште кум направлений дене туныкташ тӱҥалыт: искусство, науко да спорт. Мемнан задаче – 6-10-шо класслаште тунемше-влак коклаште талантан йоча-шамычым муаш манын, эн кӱлешан чыла мероприятийым, олимпиадым эртараш да нуным моштымашыштым профессиональный могырым вияҥдаш полшаш», – каласен Юрий Зайцев.
Республикыштына «Сириус» гай рӱдерым почмо дене видеокыл йӧн дене «Талант и успех» фондым вуйлатыше Елена Шмелёва саламлен. «Юрий Викторович школ, ешартыш образованийым пуышо рӱдер, кружок, эксперт-влак дене кылым кучышо компаний-шамычын лӱмыштым ойлен. Нуно экономикылан кӱлешан талант-влак дене пашам ыштыме уло системым вияҥдат. Вуз, предприятий дене вашкыл – тидым ме кажне регионышто вияҥдынена», – палемден тудо.
Елена Шмелёва ешарен: Марий Элысе педагог-влакым квалификацийыштым нӧлташ «Сириус» рӱдерыште ужаш – куан.
Марий Элым вуйлатышылан «Волгенчын» кабинетше ден залже-шамычым ончыктеныт. Тунемме программе почеш йоча-влакым теорий да практике занятий деч посна, проект паша, ик эн ончыл педагог-шамычын лекций ден семинарышт, индивидуальный консультаций, тыгак спорт да тӱвыра-каныме мероприятий-шамыч вучат. Чыла тиде Йошкар-Олаште верланыше Бауман лицейыште, «Чодыра йомак» эмлалтме да тазалыкым пеҥгыдемдыме комплексыште эртаралтеш.
2023 ий сентябрь гыч декабрь марте «Наука» направлений дене профилян смене-шамыч лийыт. Тыге биологий, математике, астрономий, химий, физике дене чумыр налмаште 6-8-ше класслаште 300 тунемшым авалташ палемдыме.
«Искусство» направлений дене 100 наре ӱдыр-рвезылан калык да классический вокал, театральный искусство, дизайн да архитектур дене сменылаште лияш йӧным ыштат. Тыгак 100 йоча – «Спорт» направлений дене сменыште лийыт. Шанче-технический олимпиадылан, «Большие вызовы» проектлан 3 проект сменым эртараш палемдыме.
Марий Эл Республикым вуйлатышын администрацийжын информаций паша пӧлкажын уверже негызеш Г.Кожевникова ямдылен.
