МАРИЙ ЭЛЫШТЕ – У ТӰҤ ФЕДЕРАЛЬНЫЙ ИНСПЕКТОР

Таче Марий Элыште тӱҥ федеральный инспекторын должностьышкыжо республикын ончычсо прокуроржо, юстицийын 2 классан кугыжаныш советникше Сергей Беляковым шогалтеныт.

Тудым Йошкар-Оласе Конгресс полатыште Россий президентын Юл кундем федеральный округысо полномочный представительже Игорь Комаров палдарен. У инспекторын задачыже национальный проект ден регионысо программе-шамычым илышыш пуртымо, экономикым нӧлтымӧ, калыкын доходшым кугемдыме, военно-промышленный комплексын предприятийже, военнослужащий да спецоперацийым эртарыме кумдык гыч пӧртылшӧ-влаклан полшымо дене кылдалтын, палемден полпред.

Марий Элым вуйлатыше Юрий Зайцев С.Беляковым кугу должностьыш палемдыме дене саламлен да чыла пашам ваш умылен ышташ тӱҥалмылан ӱшанымыжым ойлен.

Ушештарена, Сергей Беляков Казаньыште шочын, Казань кугыжаныш университетым тунем пытарен. Прокуратурын органлаштыже 1995 ий гыч пашам ыштен. Марий Элын прокуроржо лийын, тений февральыште пост гыч каен. Юстицийын 2 классан кугыжаныш советникше, Россий прокуратурын сулло пашаеҥже да Дагестанын сулло юристше. «Россий Федераций прокуратурын почётан пашаеҥже» оҥыш пижыктыме знак дене палемдалтын.

Тымарте Марий Элыште тӱҥ федеральный инспекторлан Павел Волков ыштен. Тудым Удмуртийышке тиде долностьышкак кусарыме. П.Волков тыгак «Элым аралыше-влак» кугыжаныш фондын пашажым курироватлаш тӱҥалеш.

М.ИВАНОВА

Марий Эл прокуратурын фотожо