Сай темлымашым — илышыш
Ю.Зайцев: Икмыняр йодышым илышыш шыҥдараш полшаш меат ямде улына. Тыгай представительствым почаш кӱлешлан шотлем.
Санкт-Петербургышто Марий Эл Республикын представительствыже лиеш.
Тыгай темлымаш дене элнан йӱдвел рӱдолаштыже илыше марий-влакын землячествышт ден «Ший корно» марий калыкле-тӱвыра автономий Марий Эл вуйлатышын пашажым жаплан шкутышо Юрий Зайцев деке лектыныт. Тиде Санкт-Петербургысо Келшымаш пӧртыштӧ эртыше вашлиймаш годым лийын.
— Тендан гай организаций-влаклан полшыманак. Илышыште тӱрлыжат лийын кертеш, ала-кӧжӧ шке шочмо кундемже деч ӧрдыж лектын кая, но чонышт дене нуно садак шке калык денак кодыт, пырля чумыргат, тӱвыраштым, йӱлаштым аралат. Ленинград областьын правительствыже марий-влак деке мелын шога. Икмыняр йодышым илышыш шыҥдараш полшаш меат ямде улына. Тыгай представительствым почаш кӱлешлан шотлем, – каласен Юрий Зайцев.
«Ший корно» марий калыкле-тӱвыра автономий вуйлатыше Евдокия Соловьеван ойлымыж почеш организацийыштлан вес ийын 10 ий темеш. «Мемнан чолгалыкнам ужын, мыланна Келшымаш пӧрт ден Ленинград областьын Верысе кучем, калык да конфессий-влак кокласе кыл шотышто комитетше кугун полшат. Область кугу гынат, ме кажне мероприятийыш погынашак тыршена. Кызытсе жапыште онлайн йӧнланат эҥертена. Кугу проект-влак дене пашам ыштена. Тений президентын культур инициативе грантшым, губернаторын грантшым да Пеледыш пайремым эртараш верысе грантым сеҥен налынна. Ты пайремна Ленинград областысе марий-влакын визитный картычкышкыже савырнен. Кугыжаныш кучем орган-влакат мыланна полшат. А полшышо уло гын, чылажат ыштыме шуэш», – каласен тудо.
Автномий вуйлатышын алмаштыштыже Галина Белашова Юрий Зайцевлан организацийын тошерыштыже экскурсийым эртарен. «Тиде – мемнан изи Родинынан отрожо. Регионла гыч толшо але тыште илыше-влак, пырля погынен, чыла кугу пайремым палемдена. Чылажымат тыште шкенан вийна дене ыштенна», – палдарен тудо.
Вашлиймаште раритетный звукозапись-влакым цифроватлыме, этномузыкологий, театр, балет, социокультурный паша шотышто специалист-влакым ямдылыме дене кылдалтше йодыш-влакым тарватеныт.
Мучашлан Юрий Зайцев Ленинград областьын Верысе кучем, калык да конфессий-влак кокласе кыл шотышто комитетшым вуйлатыше Лира Бураклан, Келшымаш пӧрт директор Ирина Гребешковалан да «Ший корно» автономийын еҥже-шамычлан марий калыкын тӱвыражым арален толмылан тауштен да землячествылан полшен шогаш сӧрен.
Марий Эл вуйлатышын организаций-аналитике виктемжын уверже негызеш С.Носова ямдылен
