Кажнын – шке моторлыкшо, сылнылыкше
21 мартыште элна мучко Поэзий кечым палемденыт. Марий артист, мурызо да палыме еҥ-влак почеламутым лудаш йӧратат мо? Кӧн сылнымут корнылаже нунылан лишыл?
Наталья Пушкина, Марий Эл Кугыжаныш Погын депутат:
– Альбертина Иванован, Зоя Дудинан, Светлана Эсаулован, Надежда Никитинан, Геннадий Сабанцевын, Василий Регеж-Гороховын, Юрий Рязанцевын, Альберт Васильевын сылнымутыштым моткоч йӧратем.
Светлана Филиппова, М.Шкетан лӱмеш Марий национальный драме театрын актрисыже:
– Почеламутым лудаш моткочак йӧратем. Мемнам, артист-влакым, Герман Прохорович Пирогов «Шочмо» ушемыш чумыра. Тудо мыланна тӱрлӧ почеламутым пуа, а ме нуным лудына. Мылам шуко поэтын возымыжо келша. Мутлан, Альбертина Иванован, Зоя Дудинан, Татьяна Пчелкинан, Вера Бояринован, Зоя Вис-Висын, Раисия Сунгурован возымышт поснак лишыл улыт.
Эльвира Монахова, военнослужащий, фотограф:
– Кажне пагытын шке саскаже, – ойла марий калык. Чынжымак, йоча-влакын йомак, модыш сынан почеламутышт шочеш, рвезе пагытын озыркан мардеж, йӧратымыш чоныштышт, ушыштышт ила. Илалше еҥым шочмо мланде, вер-шӧр, ава-ача нерген серыме сылнымут корныла куандара. А эртен кайыше да жапын-жапын уэш ушыш пӧртылтышӧ йоча пагыт, икымше йӧратымаш, школышто тунемме пагыт чоным тургыжландара, иша, шинчавӱдым луктеш. Теве мый Александр Петровын, Тоня Шабалинан, Альберт Васильевын, Ирина Закиеван, Алёна Яковлеван, Надежда Эмыканын почеламутышт-влакым ик ганат ласкан лудын ом керт, эре чон пудыранымаш тарвана.
Алевтина Байкова ямдылен.
