УВЕР ЙОГЫН

31 январь – 6 февральлан гороскоп

Шорык

Тиде арнян ятыр кырча-марча сомылым ышташ логалеш. Нунын деч те такше чотак утлаш тыршаш тӱҥалыда, но огыда керт. Лишыл еҥда-влак кокла гыч ала-кӧ черлана да тудлан полышда кӱлеш лиеш. Тыгодым шке тазалыкдамат  эскераш ида мондо.

Презе

Шукерте огыл гына палыме лийше мужыр-влакым тыглай арня вуча манаш ок лий. Але марте икте-весе коклаште чыла сай лийын гын, кызыт сырен кертыда. Амалже ала-могай ситуацийыште  шӱмбелым але йолташ-шамычым ойырен налме дене кылдалтеш.

Йыгыр

Тиде арнян кугу чаракым вашлийыда. Тудыжо шонымашкыда шуаш тыршыме годым нелылыкым луктеш. Еш, лишыл еҥ-влак дене кылдалтше тӱрлӧ йодышым решатлаш перна. Карьер тошкалтыш дене кӱзаш йӧн лектын кертеш, но те тидлан ямде огыдал.

Рак

Тыланда шуко еҥ дене мутланаш логалеш. Но шукыжо нелылыкым веле луктеш. Утларак уверым пален налмыда шуаш тӱҥалеш, иктаж-кушко миен толаш кумылда лектеш. Тыланда полшен кертше моткочак кӱлешан айдеме дене вашлиймаш кенета кӱрылтмӧ лӱдыкшӧ уло.

Лев

Шӱдыр-влак пелашлан да пашаште партнёр-влаклан тиде арнян кугурак тӱткышым ойыраш кӱлмӧ нерген шижтарат. Тӱрлӧ паша ден сомылымат нунылан ӱшанеда гын, сайрак лиеш манын «ойлат». А теве окса дене кылдалтше йодышым гын шкан ворандарыман.

Ӱдыр

Ешан-влаклан арня пелаш дене ӱчашымаш дене шарналт кодеш. Сырымаш кужун ынже шуйно манын, шӱмбелдам умылаш, темлымашыжым шотыш налаш тыршыза. Тӱҥжӧ – икте-весым колышташ да колаш тунемаш. Тунам кеч-могай нелылыкым сеҥаш лиеш.

Виса

Пытартыш жапыште иммунитет лушкымылан кӧра тазалыкда тургыжландараш тӱҥал кертеш. Сандене кылмен черланыме деч шкендам эскерыза. Поснак февральын икымше кечылаштыже тӱткӧ лийман. Икшывыда дене кылым саемдаш тыршыза.

Скорпион

Тыланда тиде арнян мӧҥгыштӧ эрыктыме, чылажымат шотыш кондымо сомылым шукташ, порядкым ышташ темлалтеш. Быт техникым, илыме верыме эшеат сылныракым ышташ тӱрлӧ ӱзгар ден арверым налын кертыда. Тыгодым йӧратыме еҥ дене умылыдымаш лектеш, очыни.

Пикшызе

Родыда, лишыл еҥ, ача-ава дене кылым саемдыман. Пашаште вуйлатыше дене ӱчашымаш марте шуын кертыда. Ончыкыжым мом, кузе ыштышаш нерген йолташда-влак дене мутланыза, деч ой-каҥашым йодса. Ӱшаныза: нуно тыланда уло кумылын полшат.

Ирказа

Тиде арнян кужу корныш тарваныман огыл. Поснак февральын икымше кечылаштыже тидым шотыш налман. Палыме да родо-шамыч дене шагалрак мутланаш, вашлияш темлалтеш. Тыгак еҥ-влак тыланда шке неле йодышыштым решатлаш тушкалтен пуэн кертыт.

Вӱд йоктарыше

Арня тӱҥалтыште эмганыме деч шекланыман. Окса чӱдылыкым шижаш огыл манын, тудым аныкленрак кучылташ тыршыман. Араш ида вашке. Шийвундо шагал улмо тендам ончыкыжымат кеч-мом налме, ышташ тарваныме деч ончыч шонаш да вискалаш туныкта.

Кол

Шыма койышан, поро кумылан улмыдам весе-влак шке кӱлешыштлан да пайдаштлан кучылт кертыт. Сандене пеҥгыдылыкым ончыкташ тӱҥалыда гын, сайрак лиеш. Йолташда-влак радамым шергал лекса. Кӧ тидым огеш суло гын, лучо шкендан деч кораҥдыза.

 

Ӱпым пӱчкаш тарваненда гын

31 январь. Таче ӱпым пӱчкыда гын, иктаж-мо уда лийын кертеш. Чиялташат огеш темлалт.

1 февраль. Тиде кечын ӱпым пӱчман огыл. Поснак – ӱдырамаш-влаклан. Уке гын тазалык начарем кертеш. Чиялтеда гын, оксада ешаралтеш.

2 февраль. Молгунамсе деч чотак ойыртемалтше прическым ышташ темлалтеш. Тыге оксада ешаралтеш. Ӱпым чиялтыме пашаште у кӱкшытыш шуаш полша.

3 февраль. Таче ӱпым пӱчмылан да чиялтымылан кӧра коваште дене нелылык лектын кертеш.

4 февраль. Ӱпым пӱчкыда гын, усталыкда кугемеш, ушыштыда оҥай у шонымаш-влак шочыт. Ошалге тӱсыш чиялтыме кӱлешан деловой кылым ышташ полша, окса ешаралтеш.

5 февраль. Шийвундо шукырак толаш тӱҥалже, тазалык пеҥгыдырак лийже манын шонеда гын, таче ӱп мучашым пӱчкаш темлалтеш. А теве чиялташ вашкыман огыл. Уке гын пашаште але лишыл еҥ-влак дене ӱчашымаш тарвана.

6 февраль. Таче ӱпым пӱчкыда гын, ик велымже, иммунитет лушкен, чер авалтен кертеш. Вес велым, интуиций вияҥеш. Чиялтеда гын, утларак мотор да сымыстарыше лийыда.

Л.Камалетдинова  

 

 

 

Опубликовать в Одноклассники

Добавить комментарий