Йошкар-Оласе Суворов уремыште (Машиностроителей урем гыч тӱҥалын Ползунов урем марте) йолешке-влак коштмо тротуарын кок велымже бордюрым оптат, паша мучашлалтмек, асфальтым шарат. Тиде кумдыкым, «Оласе йырвелым йӧнаным ыштымаш» нацпроект дене келшышын, олаште илыше-влакын кодшо ийын йӱклымашышт почеш тӱзатат.
Теат шкендан илыме микрорайонда, кудывечыда але пӧртда воктене чыла шотыштат йӧнан лийже манын шонеда гын, 12.gorodsreda.ru сайтыш пурыза да 2022 ийыште тӱзатышаш кумдык верч йӱкдам пуыза. Тидым ышташ моткоч куштылго. Йӱклымаш 30 май марте шуйна. Марий Элыште чылаже 31 объектым палемдыме. Могай кумдыкым ойырышаш верч эн шуко йӱкым пуэда, нуным федерал окса кӱшеш тӧрлаш да олмыкташ тӱҥалыт.
Л.СЕМЕНОВА
