Андрей НИКОЛАЕВ – Морко район Немычсола ялын эргыже. Ондак Изикугунур тӱҥ, вара Волаксола кыдалаш школышто шинчымашым налын. Умбакыжым Йошкар-Оласе строительный техникумышто юристлан тунемын гынат, эре чоҥымо пашаште тырша. Кызыт ялыште брусчаткым ыштыме производствым тӱҥалын. Почеламутым возаш, але шке манмыжла, «мутым рифмоватлаш» коло ияшракше годым тӱҥалын. 2019 ийыште самырык поэтессе Алена Яковлева дене вашлиймыже, «Кугарня» газетыште почеламут-влак подборкыжо савыкталтмыже 28 ияш рвезылан кугу шӱкалтыш лийыныт.
– Андрей дене интернет гоч палыме лийынна. Тудо мыланем тӱҥалтыште мыскара сынан, ӱдыр-влак лӱмлан келыштарыме почеламутшо-влакым колтедылын. Оҥай! Йоҥылышыжо-влакым ужынам гынат, тӧрлатылаш ӧрынам, но кунам интернетысе лаштыкышкыже шындедылаш тӱҥале, мый шоналтенам: «Еҥ-влак лудыт, ужыт, сӧрал огыл, кораҥдылаш кӱлеш». Тыге Андрейым редакцийыш ӱжынам, – каласкала Алена Яковлева. – Толын. Кагазеш печатлен лукмо почеламутшо-влакым шарен оптенна да мый умылтаренам: вот, манам, ик размер дене возаш тӱҥалынат гын, тудо размер денак пытарышаш улат. А тудын йоҥылышыжо, ужам, ик почеламутыштак ик куплет ямб, весе хорей, кумшо куплет амфибрахий дене возалтыныт – рвезе поэзий законым, почеламут возалтме техникым ок пале. Тидлан вурсыман огыл, тудым нигӧ туныктен огыл. Но поэзийым шижмашыже уло, сӱретшымак ужын мошта, мастарлыкшат ситышын. Теве Сеҥымаш кече вашеш ты темылан почеламут кӱлеш лийын, мый Андрей деч йодынам. А тудо: – Мо нерген возаш? – Шоналте. – Жапем уке, – вашештен, а пел шагат гыч тыгай келге шонымашын почеламутым колтен, лудынам да шинчавӱдем йоген, мыйын шкемын опытем уло гынат, ом керт тыге возен…
Тылеч вара рвезе почеламутшо-влакым интернет гыч чыла кораҥден да тӧрлатылын уэш шынден. Алена тудым семинарышкат ӱжын, сылнымут конкурс-влак улмо нергенат ойлен, но Андрей кызытеш ок вашке.
Палемден кодем, тӱҥалше автор поэт Альберт Васильевын мӱндыр родыжо лиеш, тугеже кок поэтын тукым вожшо ала икте манын шонашат лиеш. Арам огыл дыр Андрейын возымаштыже политике, тыглай кресаньык илыш дене кылдалтше почеламут-шамыч вашлиялтыт. Но утларакше…
– Почеламутем-влак тӱҥ шотышто ӱдыр, ӱдырамаш-влак – кузе нуно пӧръеҥ шинчаште койыт – нерген улыт. Но тиде так, романтизм. Шагал кӧ акла, шонем. Мыйын почеламут ден кызытсе ӱдыр коклаште – кугу ойыртем, – ойла автор.
Л.СЕМЕНОВА
Толам, йолташ, пӧрткайык семын!
Толам мый, вучо, шӱм пелаш!
Луктам тылат эн сылне семым…
Тӱҥале угыч йӱр велаш…
Колтем уверым мардеж дене,
Я лыве дене чоҥешта…
Ит ӧр, кунам лупсан эрдене
Мардеж йӱкем ден пелешта…
Шарнет, кӱза эрдене кече –
Йырваш каваште ал деч ал…
Илем тӱняште тыйын верчын –
Чевер шӱргет колтем шупшал…
Андрей Николаевын почеламутшо-влакым 14 сентябрьыште лекше «Марий Эл» газетыште лудса.
