ВКонтакте социальный кылысе «Коронавирус. Марий Элын оперативный штабше» официальный каналын палдарымыж гыч, 22 апрельыште регионыштына у коронавирус инфекций дене авалталтме эше 22 у случайым регистрироватлыме. Тыге, республикыштына COVID-2019 дене чылаже 333 еҥ черланен.
Марий Элын Тазалыкым аралыме министерствыжын увертарымыж почеш, эртыше суткаште республикнан стационарлаж гыч у коронавирус инфекций шотышто эмлалтме курсым эртыше 29 пациентым мӧҥгышкышт колтымо. Тыгодымак коронавирус дене черланымым пеҥгыдемдыме диагнозан да инфекцийым авалтен кертыныт манын шонымо 215 пациентым умбакыже эмлат:
• Йошкар-Оласе больницын инфекционный отделенийыштыже – 143 еҥым;
• Йоча республиканский клинический больницыште – 14 икшывым;
• Звенигово районысо рӱдӧ больницын коронавирусан пациент-влаклан палемдалтше отделенийыштыже – 8 еҥым;
• Козьмодемьянск межрайонный больницын инфекционный отделенийыштыже – 9 черлым;
• Волжск оласе рӱдӧ больницын инфекционный отделенийыштыже – 8 пациентым;
• Марий Турек районысо рӱдӧ больницын инфекционный отделенийыштыже – 23 еҥым;
• Медведево районысо рӱдӧ больницын коронавирусан пациент-шамычлан хирургический да акушерско-гинекологический профилян медицине полышым пуымо корпусыштыжо – 10 пациентым.
215 гыч 41 пациентын у коронавирус инфекций дене авалталтмыштым пеҥгыдемдыме, 45 черле неле состоянийыште, 164 еҥын тазалыкше «нелылыкын кокла йыжыҥже» семын аклалтеш, кудытын – «нелылыкын куштылго йыжыҥже» семын.
Кок пациент шодым искусственно вентилироватлыме йӧн дене шӱла, 88 еҥлан кислород кӱлеш.
М.ИВАНОВА
