24 апрельыште Сергей Чавайн лӱмеш калыкле тоштерыште «Тоштерыште йӱд-2021» акций лийын. Тений тудо сандалыклан пӧлеклалтын.
«Ты мероприятийым Российыште 2012 ий гыч эртарат. Ме икымше гана 2013 ийыште ушненна. Индешымше акцийнам «Книга – шӱдыр деке корно» манын лӱмденна», – рашемдыш книга палате пӧлкан вуйлатышыже Елена Смородинова.
Краеведений площадке «Мый улам уныкаже Онарын» программе дене вашлийын. «Чылаже куд станций. Толшо-влакын уш-акылыштым тергаш икмыняр викториным ямдылыме. Мутлан, ик вере марий талешке-влак нерген йодыштынна, вес вере финн-угор калык-влак нерген палымыштым тергена. Тыгак фотом ышташ лӱмын верым ямдылыме. Уна-влак, марий тувырым чиен, войзалт кертыт. Сӱретлен ончашат йӧн уло», – палдарыш краеведений пӧлкан вуйлатышыже Светлана Сауляк.
Мылам «Сандалык да сымыктыш» квиз модмаш оҥайын чучо. Садлан участник-влак радамыш ушнышым. Кум еҥ дене команде-влак погынышна: «Юпитер», «Сириус», Тис», «Коллективный разум». Ме Кыргызстан гыч Юл кундем кугыжаныш технологий университетыш тунемаш толшо рвезе-влак Сулайман ден Ырыскелди дене изи ушемнам «Nasa» манын лӱмдышна.
Йодыш-влак гоч кинематографий, сандалык, муро, сылнымут да кумдан палыме еҥ-влакын лӱмыштым палымынам тергышт. Кӧ космосыш икымше гана лектын? Йошкар-Ола астероидым почшо совет астрономын лӱмжӧ кузе? Ю.Гагаринын ракетыже сандалык гыч пӧртылмекше могай регионыш шинчын?
Ты йӱд пеш тӱвыргӧ ыле. Экскурсийым эртареныт, кушташ туныктеныт, модыктеныт, караоке залыште мурыктеныт, планетарийыш ӱжыныт, фото, сӱрет книга ончер-влакым ямдыленыт.
О.МОШКИНА
