Бизнесыш пеш эр толшо-влаклан ӧраш гына кодеш. Нуно тугай чолга улыт, нимо деч ӧрын огыт шого, паша дечат огыт лӱд, лектышыштат изи огыл. Нунын дене кутырашат оҥай – шкеныштым шылташ огыт тӧчӧ. Параньга посёлкышто быт да компьютер техникым ужалыше-обслуживатлыше-олмыктышо «Импульс» торгайыме верын озаже И.И.МУХАМАТОВ лач тыгай.
– Ислам Ильсурович, тыйын лӱмет пеш оҥай манын от шоно?
– Мый тыште титакан омыл, ачам ден авам тыгай лӱмым пуэныт.
– Бизнесыш пеш эр толаш кузе чолгалыкетше ситен?
– Тиде 2013 ийыште лийын, мылам тунам 21 ий ыле. Казаньысе федерал университетым автоматизироватлыме системын информационный лӱдыкшыдымылыкшым комплексно шуктен толмаш специальность дене тунем пытарымеке, Параньгаште ты сферыштак вес оза дене ик ий торгайышым. Но весе дене да весылан ыштымем ыш шу да шке пашам тӱҥалаш шонен пыштышым. Келшыше верым муым. Но мылам тунам кредитым пуэн огытыл, сандене ачам лӱмеш (а тудо тунам ик организацийыште водительлан ыштен) нална да сатум кондышна. Кузе ыштышашым паленам гын, паша кайыш веле.
– А икымше сатудаже могай ыле?
– Тӱҥ шотышто быт технике. Но, мутат уке, шагал ыле. Вара поставщик-влак дене договорым ыштышым, расчётный счётым почым. Посёлко покшелне вер лекмеке, теве тиде кевытыш куснышым. Ик ий арендыште кучышым, вара кредит дене тӱлен нальым.
– Адак кредит дене… Лӱдын отыл мо?
– Лӱдын шинчен, бизнесым от ыште. Неле, конешне, пӧртылташ, вет шагал огыл – 2,5 миллион теҥгем – налынам. Кызытат тӱлем. Лиеш ыле кредитым ончычак петыраш, но вет сатум эре налын шогыде ок лий.
– Еҥ-влак ончыч оксам чумырат, вара бизнеслан пижыт. А тый компьютер бум манметлан ӱшаненат, векат?
– Тыгеат ойлаш лиеш дыр. Но мыйже быт ден компьютер техникым ужалем веле огыл, вес услугымат шуктем. Организаций-влакын шуко функциян устройствыштым, принтерыштым обслуживатлем, катриджыштым заправитлем, компьютерым олмыктем. Да чыла тидым шкетын шуктем. Кандаш ий отпуск да каныш деч посна ыштем. Ынде ик пашаеҥым налашак шонем.
– Чытышетлан ӧраш гына кодеш. Да эше мастарлыкетлан… Кунам компьютер техникылан шӱмаҥынат?
– Шымше классыште тунемме да латныл ияш улмо годым икымше компьютерым налынам. Шке ыштен налме окса дене. Каникул жапыште паша вер рӱдерыште учётыш шогалынам да кеҥеж мучко паркым, корным эрыктымаште, газонным солымаште тыршенам. Тиде окса шулдырак компьютерлан ситен. А радиотехникылан ондакак шӱмаҥынам. Индеш-лу ияш годым тошто кок стационар телефон гыч иктым погенам. Вич-куд ияш годым ачамын кондымо кассетан магнитофонным ронченам…
– Тугеже умылаш лиеш, молан тыгай корным ойырен налынат. А могай сатулан кызыт йодмаш кугурак?
– Компьютер кокла гыч ноутбукым утларак налыт. Ковид амал дене школышто дистационно туныктымылан кӧра, векат. Кеч тудо пытартыш ийлаште чотак шергештын. Быт технике кокла гыч телевизор сайын кая. Вургем мушмо машина ден холодильник деч поснат огыт серлаге. Мемнан зданийже кугужак огыл, чыла от вераҥде, сандене йодмо почешат конден пуэна.
– Теве пырдыжыште ала-могай награде коеш?..
– 2019 ийыште «Российын самырык предпринимательже» конкурсын регионал йыжыҥыштыже «Торговльо» номинацийыште икымше верым налынам. Республикын Самырык политике, спорт да туризм министерствыже дипломым кучыктен. Тидын годым паша лектышым онченыт, векат: куд ий жапыште паша вер собственностьышто лийын, сату оборот палынак кугемын, сервис обслуживатлыме сайын аклалтын. Сандене самырык-влаклан иктым гына тыланем: тӱҥалаш ида лӱд, тыршеда гын, шот лектеш.
Юрий ИСАКОВ
