Шорык
Тиде арнян шке нерген утларак тургыжланыза, нервыдам аралыза. Шӱдыр-влак тыланда мо да кузе келша, чылажымат туге ышташ темлат. Мом кӱлешлан шотледа, тудлан оксам аныклыман огыл. Лишыл еҥ-влаклан шукертсек шонен коштмыдам каласаш кумылда лектеш.
Презе
Чыланат шошын пытарыш кечылажлан да кеҥеж тӱҥалмылан куанат, а тендан чондам шӱлык авалта. Тидыже нойымыда дене кылдалтын. Санденак те каналташ йӧным кычалаш тӱҥалыда. Тиде арнян у йӧратымаш кыл шочын кертеш.
Йыгыр
Шонен пыштымыдам шукташ нигӧ да нимо чаракым ыштен огыт керт. Тыгай койышда пашам пырля ыштыше-влакым ӧрыктара. Шарныман: шонымашке шуаш палыме-влакат полшен кертыт. Кугурак ийготан еҥын тендам мокталтен ойлымыжо кумылдам чотак нӧлталеш.
Рак
Тиде арнян шке йыр чылажат мотор, ойыртемалтше лийже манын гына тыршаш тӱҥалыда. Ешыште тыгай кумылдам огыт умыло да ала-мом шергаканым налаш шонен пыштымыда ваштареш лийыт гынат, те тидым шотышкат огыда нал. Арня мучаште чондам шӱлык авалта.
Лев
Пашаштат, мӧҥгыштат ласкалык озаланаш тӱҥалеш. Тиде амал дене шкендан дене кылдалтше сомыллан жапым утларак ойырен кертыда. Еҥ-влаклан секретдам почаш ида вашке. Тиде арнян у еҥ дене палыме лийыда, оҥай приключений вуча.
Ӱдыр
Тиде арнян уло шонымашда йӧратымаш да каныш нерген гына лийыт. Ала-кушко миен толыда. Шке сомылдалан шукырак жапым ойырыза. Пашаште ала-могай темлымаш деч тореш лийыда. Икмыняр жап гыч умыледа: тыге ыштымыда дене чын лийында.
Виса
Вуйлатыше тыланда ала-могай кугу пашам ышташ кӱшта. Ида тургыжлане: чылажымат кӱлеш семын да жапыштыже шуктеда. Коллегыда-влакат полыш кидым шуялтат. Но пашалан утыждене шуко жапым ида ойыро, уке гын личный илышдалан шагал кодеш.
Скорпион
Нине кечылаште сайын шоналтыде нимогай пашамат ида тӱҥал. Ремонтым тарваташат келшыше жап огыл. Каныш кечылаште мӧҥгысӧ сомыллан тунар огыл, кунар йӧратыме еҥлан утларак жапым ойырыза. Уке гын коклаштыда умылыдымаш лектын кертеш.
Пикшызе
Илыш йокрок, нимом ышташ манын, вуйым шийын ида шинче. Мӧҥгешла, чонланда келшыше иктаж сомылым муаш тыршыза да тудлан жапым ойыраш тӱҥалза. Тыге кумылдат нӧлталтеш, кӱлешан пашам ыштымыда гаят чучеш.
Ирказа
Южышт шыдыдам чотак лукташ тӱҥалыт: икте тендан деч утыжденат шуко йодеш, весе пашам ышташ ӧркана… Тидыже нуным «верышкышт шындаш» кумылым луктеш. Нервыдам аралыза – вурседылмашке ида ушно. Адакшым тиде нимо сайышкат огеш шукто.
Вӱд йоктарыше
Тиде арнян йокрокланаш жапда огеш лий. Пашаште иктышт тыршымыдам кӱлеш семын аклат, весышт тендан семын кояш тыршаш тӱҥалыт. Канышланат жапым муза. Уке гын тазалыкда начарем кертеш. У еҥ дене палыме лийме кумылдам нӧлталеш.
Кол
Пытартыш жапыште илышыштыда иктаж-мо уда лийын гын, тидын нерген мондаш тыршыза да чондам «колыштса». Иктаж-мом ойыртемалтшым ыштыза, иктаж-кушко миен толза. Тиде кумылдам эшеат нӧлталеш. Ончычсо шӱмбелдам кушто вашлийын кертыда, тушко лучо ида кай.
Тазалыклан йӧнан кече
1-2 июнь. Нине кечылаште кумыл нӧлтшӧ лиеш, тиде амал дене тазалык тургыжландарымымат шижаш огыда тӱҥал.
Тазалыклан йӧнан огыл кече
27-31 май. Тиде жапыште тылзе тоштемеш, сандене поснак тӱткӧ лийман. Ӱнар пытыме, кумыл волымо шижалтеш, депрессий авалтен, хронический чер-влак шкешт нерген палдарен кертыт.
Ӱпым пӱчкаш тарваненда гын
27 май. Таче ӱпым пӱчкыда гын, тӱжвал сында ала-молан лювыкын гай кояш тӱҥалеш. Чиялтеда гын, ӱпда локтылалтеш.
28 май. Окса ешаралтше манын шонеда гын, ӱпым пӱчса. А теве чиялташ гын огеш темлалт.
29 май. Тиде кечын ӱпым пӱчкыда гын, моткоч эркын кушкаш тӱҥалеш. Чиялтен кертыда.
30 май. Таче ӱпым пӱчкыда гын, коллегыда-влак дене кыл саемеш. Чиялташ огеш темлалт.
- май. У прическо кумылдам нӧлталеш, вийым ешара. Шемалге тӱсыш гына чиялтыман.
1 июнь. Ӱпым пӱчкаш огеш темлалт. Чиялташат келшыше кече огыл.
2 июнь. Тиде кечын ӱпым пӱчкашат, чиялташат огеш темлалт.
Л. КАМАЛЕТДИНОВА
